मुळशीतील महामार्गावर झुकलेल्या फांद्यांमुळे धोका

पौड, ता. ८ : पुण्यातून कोकणाला जोडणाऱ्या राष्ट्रीय महामार्गावर ठिकठिकाणी मोठी झाडे रस्त्याच्या बाजूला झुकली आहेत. यापूर्वी पावसामुळे झाडे रस्त्यावर पडून वाहतूक कोंडी झाली होती. रस्त्याच्या बाजूला झुकलेल्या या झाडांमुळे अपघाताचा धोका संभवतो. त्यामुळे महाराष्ट्र राज्य रस्ते विकास महामंडळाने या झाडांच्या रस्त्याकडे झुकलेल्या फांद्या वेळीच कापणे गरजेचे आहे.
या राष्ट्रीय महामार्गावर दुतर्फा मोठ मोठी झाडे वाढली आहेत. जुनी असल्याने काही झाडे आकाशाच्या दिशेने झेपावली आहेत. मुख्य रस्त्याच्या कडेला असलेल्या झाडांच्या फांद्यामधून महावितरणच्या वीजेच्या ताराही गेल्या आहेत. तथापि पडत असलेल्या मुसळधार पाऊस आणि मोठमोठ्या यंत्रांच्या साहाय्याने जमीनीची खोदाई केली जात आहे. त्यामुळे परिसरातील अनेक झाडांचा पाया सैलसर झाला आहे. त्यामुळे अनेक झाडांच्या फांद्या रस्त्याच्या बाजूने झुकल्या आहेत.
भूगावला अॅम्ब्रोसिया हॉटेल ते मानस तलावापर्यंत रस्त्याच्याकडेला असलेली झाडे रस्त्याच्या बाजूने वाकली आहेत. यापूर्वी पावसामुळे रस्त्याकडची झाडे पडून वाहतुकीची कोंडी झाली होती. झाड पडल्यानंतर फांद्यामधून गेलेल्या वीजेच्या ताराही तुटतात. अनवधानाने वीजपुरवठा चालू राहिल्यास जीवितहानीचा धोकाही निर्माण होऊ शकतो. त्याचप्रमाणे नागरिकांनाही विजेअभावी अंधारात राहण्याची वेळ येत असते. त्यामुळे या झाडांची काटछाट करणे गरजेचे आहे. किंवा मुळासकट ती झाडे काढून जंगलात दुसरीकडे लावण्याची आवश्यकता आहे. मे महिन्यात झालेल्या अवकाळी पावसात मानस तलावाजवळील चढाच्या वळणावर झाड अचानक रस्त्यात पडले होते. सुदैवाने त्यात कोणतेही नुकसान झाले नाही.

भूगाव येथील रस्त्यावर अनेक झाडांच्या मोठ मोठ्या फांद्या रस्त्याच्या बाजूला वाकलेल्या आहेत. झाड रस्त्यात पडल्यानंतर भूगावमधील युवक पुढे येऊन फांद्या बाजूला करीत असतात. परंतु, अचानक झाड पडल्यानंतर मानवी जीविताला धोका पोचू शकतो. त्यामुळे तातडीचा उपाय म्हणून रस्त्याच्या बाजूला वळलेल्या फांद्या तोडण्याची आवश्यकता आहे.
- अक्षय सातपुते, माजी उपसरपंच, भूगाव (ता. मुळशी)