बलात्कार करणाऱ्यास दहा वर्षे सक्तमजुरी

पौड, ता. १४ : अल्पवयीन मुलीवर बलात्कार करणाऱ्या नराधमाला न्यायालयाने ‘पॉक्सो’अंतर्गत दहा वर्षे सक्तमजुरीची शिक्षा ठोठावली. विजय पंढरीनाथ जाधव (वय ३८, रा. पानसरेवस्ती, भुकूम, ता. मुळशी, मूळ रा. पुसद, काकडदाती, गोविंदनगर, जि. यवतमाळ) असे या नराधमाचे नाव आहे. ही घटना पाच वर्षापूर्वी घडली होती.
याबाबत मिळालेली माहिती अशी, पीडित मुलगी आई, वडील, भाऊ, बहिणीसह भुकूम पानसरेवस्ती येथे भाड्याच्या घरात राहत होती. तिचे आई-वडील मोलमजुरीचे काम करून कुटुंबाची उपजीविका भागवायचे. त्यांच्या घराशेजारीच विजय राहत होता. त्याने ७ मार्च २०२० या दिवशी १२ वर्षे ११ महिने वय असलेल्या मुलीबरोबर खोटे प्रेमाचे नाटक करून तिला पळवून नेले. तिच्यावर शेळकेवाडी येथील एका ज्वारीचे शेतात बलात्कार करून तिथून तो पसार झाला होता.
या दरम्यान कुटुंबीयांनी मुलीचा शाळेत, मैत्रिणीकडे तसेच नातेवाइकांकडे सर्वत्र शोध घेतला. परंतु ती न मिळाल्याने तिच्या आईने दुसऱ्या दिवशी पौड पोलिस ठाण्यात तिच्या अपहरणाची तक्रार दाखल केली. घरी येऊन मुलीने घडलेला प्रसंग आईला सांगितला. पोलिसांना याची माहिती मिळाल्यानंतर जाधव याच्यावर ‘पॉक्सो’अंतर्गत बलात्काराचा गुन्हा दाखल केला.
त्याला १३ मार्चला पुसद यवतमाळमध्ये अटक केली. तत्कालीन महिला पोलिस उपनिरीक्षक आर. जी. दुधभाते यांनी या प्रकरणाचा सखोल तपास केला. पंचनामा, साक्षीदार यांच्या जबानी, आरोपीने दिलेली कबुली या साक्षी पुराव्यावरून जिल्हा व अतिरिक्त सत्र न्यायाधीश पी. आर. चौधरी यांनी आरोपी जाधव याला १० वर्षे सक्तमजुरी आणि ५०० रुपये दंडाची शिक्षा सुनावली. तसेच, दंड न भरल्यास तीन महिने साध्या कैदेची शिक्षा करण्याचे आदेश दिले. पुष्कर सप्रे यांनी सरकारी वकील म्हणून काम पाहिले.