पौडला शुद्धीकरण प्रकल्पाचा खर्च पाण्यात

पौड, ता. १७ : पौड (ता. मुळशी) येथे एक लाख रुपयांच्या पाणी शुद्धीकरण प्रकल्पासाठी ग्रामपंचायतीने चक्क अडीच लाख रुपये खर्चून पत्र्याचे शेड उभारले आहे. सहा महिन्यांपूर्वी हा खर्च केलेला असताना सध्या या ठिकाणी शेडचा केवळ सांगाडाच उभा आहे. त्यामुळे यात गैरव्यवहार झाल्याचा आरोप ग्रामपंचायतीचे नवनिर्वाचित सरपंच किरण आगनेन, उपसरपंच प्रीती आगनेन यांनी केला असून सहभागी असलेल्यांच्या चौकशीची मागणी केली.
पौडला तहसीलदार कार्यालय आणि पंचायत समितीच्या दोन प्रवेशद्वाराच्यामध्ये एका कोपऱ्यात काही दिवसांपूर्वी एक लोखंडी उंच शेड उभे केले होते. याठिकाणी काय होणार याविषयी नागरिकांना काहीच माहिती नव्हते. पौडच्या सरपंचपदी नियुक्ती झाल्यानंतर आगनेन यांनी या संदर्भात माहिती काढल्यानंतर या ठिकाणी ग्रामपंचायतीमार्फत पाणी शुद्धीकरण प्रकल्प उभारण्यात येणार आहे असे समजले. त्यांनी याबाबत सखोल माहिती घेतली असता या प्रकल्पाच्या मशिनची किंमत एक लाख रुपये आहे, तर या मशिनच्या संरक्षणासाठी उभारलेल्या पत्र्याच्या शेडसाठी ग्रामपंचायतीने अडीच लाख रुपये खर्च केल्याचेही त्यांच्या निदर्शनास आले. तथापि साडेतीन लाख रुपये खर्चूनही याठिकाणी कोणत्याही प्रकारचा प्रकल्प उभारला नसल्याचे दिसून येते. या प्रकल्पासाठी उभारण्यात आलेल्या शेडचा खर्च तीस हजार रूपयांपेक्षा जास्त नाही. तसेच पाणी शुद्धीकरण यंत्रही याठिकाणी बसवलेली नसून पौडकरांच्या पैशाची उधळपट्टी करण्यात आली आहे. त्यामुळे यामध्ये सहभागी असलेल्यांची चौकशी व्हावी अशी मागणी आगनेन आणि सदस्या मोनाली ढोरे यांनी गटविकास अधिकारी सुधीर भागवत यांच्याकडे केली आहे. याबाबत ग्रामसेविका माधुरी झेंडे यांनी सांगितले की ग्रामपंचायतीमध्ये ठराव करूनच या कामाला सुरूवात करण्यात आली होती. ठेकेदाराला जादा पैसे गेल्याचे निदर्शनास आल्यानंतर त्याने ठरविलेल्या निविदेवरील पैसे ग्रामपंचायतीकडे परत केले. शेडचेही काम पूर्ण झाले होते. मात्र मागील पुतळा दिसत नसल्याने काही जणांनी हरकत घेतल्यानंतर ते काम थांबविण्यात आले. आरओ प्लाँन्टची मशिनही आणली होती. मात्र ती आलेल्या हरकतीनंतर बसविण्यात आली नाही.