सिद्धीने केले आई-वडिलांचे स्वप्न पूर्ण

राहू, ता. १७ : रविवारी तसेच शाळेला सार्वजनिक सुट्टी असणाऱ्या दिवशी आई-वडिलांसमवेत मजुरी काम करणाऱ्या वाळकी (ता. दौंड) येथील नवभारत विद्यालयातील सिद्धी थोरात हिने दहावीच्या परीक्षेत ८६.२० टक्के गुण प्राप्त करत शाळेत प्रथम क्रमांक पटकाविला.
सिद्धीचे वडील सोमनाथ आणि आई मोलमजुरी करून आपल्या कुटुंबाचा उदरनिर्वाह अनेक वर्षांपासून करतात. रविवारची तसेच सार्वजनिक सणाच्या त्या दिवशी आई-वडिलांना मजुरीचे काम करून आर्थिक हातभार सिद्धी लावत होती. तिने रात्रंदिवस अभ्यास करून शाळेमध्ये प्रथम क्रमांक येण्याचे स्वप्न साकारले तिच्या यशाबद्दल शाळेतील शिक्षक आणि ग्रामस्थांकडून तिच्या यशाबद्दल कौतुकाचा वर्षाव होत आहे. वाळकी ग्रामपंचायत आणि ग्रामस्थांच्या वतीने तिचा सत्कार करण्यात आला. सिद्धीने आर्थिक परिस्थितीवर मात करत यश प्राप्त केल्याबद्दल वाळकी ग्रामस्थांच्या वतीने अकरा हजार रुपयांची मदत केली आहे. सत्कारप्रसंगी तिच्या भावना दाटून आल्या.
याप्रसंगी दौंड कृषी उत्पन्न बाजार समितीचे माजी सभापती बाळासाहेब थोरात, माजी सरपंच ज्योती थोरात, उपसरपंच नानासाहेब चोरमले, संजय थोरात, भरत काळे, तंटामुक्तीचे माजी अध्यक्ष काकासाहेब तापकीर, संभाजी भालेराव, ग्रामसेवक एस. एस. सय्यद, सुरेश कदम, पंढरीनाथ टुले, दिलीप हाके, जनार्दन थोरात, प्रशांत हांडे, दौलत भालेराव, बाजीराव भालेराव, संदीप भालेराव, संपत तापकीर, राजेंद्र थोरात, बाळासाहेब जोंधळे, संजय जोंधळे, राजेंद्र जोंधळे, माउली काळे आदी उपस्थित होते.

माझ्या आई-वडिलांनी आमच्यासाठी रात्रंदिवस कष्ट केले. कष्टाची मी जाण ठेवली आहे. मला कर्तव्यदक्ष क्लासवन शासकीय अधिकारी व्हायचं आहे. त्या पद्धतीने यापुढे माझी शैक्षणिक प्रगती सुरू ठेवणार आहे. जिद्द, चिकाटी, आणि अभ्यासातील सातत्य त्यामुळे मला यश प्राप्ती मिळाली.
- सिद्धी थोरात