खामगावच्या विकासाचा मार्गच खडतर

राहू, ता. १४ : खामगाव फाटा ते खामगाव हा रस्ता दळणवळणाच्या दृष्टीचे महत्त्वाचा आहे. हा रस्ता खामगावाला पुणे-मुंबई महामार्गाशी जोडणारा असल्याने वाहनांची कायम वर्दळ असते. सार्वजनिक बांधकाम विभागाच्या दुर्लक्षामुळे गेल्या अनेक वर्षांपासून वाहतुकीसाठी तो जीवघेणा ठरत आहे. जागोजागी खड्डे पडल्याने रस्त्याची मोठी दुरवस्था झाली आहे. वाहनचालकांना मोठी तारेवरची कसरत करावी लागत असून साइड पट्ट्याही पूर्णपणे तुटल्या आहेत. याकडे वेळीच लक्ष घालून रस्ता दुरुस्त करण्याची मागणी ग्रामस्थांकडून होत आहे.
खामगाव फाटा ते खामगाव रस्त्याने गावातील नागरीकांना उद्योग व्यवसाय, शाळा, नोकरी, रुग्णालय, महाविद्यालयीन शिक्षणासाठी दळणवळण करावे लागते. राहू व खामगाव परिसरातील गाडोमोडी फाटा मार्गे खामगाव फाट्यावरून पुणे-सोलापूर महामार्गाकडे जाणारी वर्दळ मोठ्या प्रमाणात आहे. खड्ड्यांमुळे छोट्या मोठ्या अपघातांत वाढ झाली आहे. रस्ता अनेक ठिकाणी अरुंद असल्यामुळे दोन वाहने एकत्र आल्यास अडचण होते. खड्डा चुकविण्यासाठी घेतलेले वळण अपघातांसाठी कारणीभूत ठरत आहे. नाहक त्रास सहन करीत जीवघेणा प्रवास करावा लागत असल्याचे योगेश नागवडे, सुरेश नागवडे, दत्तात्रेय नागवडे, दीपक नागवडे आदी ग्रामस्थांनी सांगितले.

खामगाव ग्रामपंचायतीअंतर्गत कोट्यवधी रुपयांची विकास कामे झाली आहेत. विविध विकास कामांसाठी तालुक्यातील आजी-माजी लोकप्रतिनिधी, राष्ट्रवादी काँग्रेसच्या विभागीय अध्यक्षा वैशाली नागवडे यांच्यासह उपमुख्यमंत्री अजित पवार यांचे सहकार्य लाभले आहे. मात्र, खामगाव फाटा ते खामगाव खराब रस्ता गावाच्या विकासास मारक ठरत आहे. त्याची लवकरात लवकर दुरुस्ती होणे आवश्यक आहे.
- योगेश मदने, सरपंच, खामगाव (ता.दौंड)

खामगाव फाटा ते खामगाव रस्त्याची तात्पुरती डागडुजी करून रस्ता दुरुस्त केला जाईल. भविष्यात या रस्त्याचे रुंदीकरण होणार आहे.
- मयूर सोनवणे, उपकार्यकारी अभियंता, सार्वजनिक बांधकाम विभाग, दौंड

गाडामोडी चौकातील अतिक्रमण हटवा
गाडामोडी चौकात अनेक टपऱ्या, हॉटेलसह इतर विक्रेते रस्त्यालगतच ठाण मांडून व्यवसाय करत आहेत. त्यामुळे ही अतिक्रमणे वाहतुकीस अडथळा ठरत असून अपघाताचीही धोका वाढला आहे.