खरेदीसाठी राहूत भक्तांची गर्दी

राहू, ता. २७ : पारंपरिक वाद्य, फटाक्यांच्या आतिषबाजीमध्ये विघ्नहर्त्याची बुधवारी (ता. २७) सकाळी सातपासून सायंकाळी पाच वाजेपर्यंत परिसरातील गणेशभक्तांकडून प्रतिष्ठापना करण्यात आली. सकाळपासूनच भक्तांनी मूर्ती खरेदी करण्यासाठी गर्दी केली होती.
यंदा गणेशमूर्तीसह सजावटीच्या साहित्यांच्या किमती भरमसाठ वाढल्या आहेत. विक्रीसाठी ५०० रुपयांपासून १५ हजार रुपयांपर्यंतच्या किमतीच्या मुर्त्या ठेवल्या होत्या. सुमारे दोन हजारांहून अधिक लहान- मोठ्या मूर्तींची विक्री झाल्याचे मूर्तिकार बापू कुंभार, गोरख कुंभार, गणेश कुंभार, माणिक कुंभार, स्वप्नील कुंभार, संभाजी कुंभार आदी मूर्तिकारांनी सांगितले.
‘एक गाव एक गणपती’ ही संकल्पना अनेक गावांमध्ये राबवण्यात आली. मात्र, घरोघरी गणपती बसवण्यासाठी नागरिकांनी स्वागत केले. परिसरातील लोकसेवा तरुण मंडळ, गणेश तरुण मंडळ (भोईआळी), एकता तरुण मंडळ, शिवराज तरुण मंडळ, हनुमान मित्र मंडळ, द-त प्रतिष्ठान माधवनगर, जय धुळोबा मित्र मंडळ टेळेवाडी, श्रीनाथ म्हस्कोबा म्हस्कोबा तरुण मंडळ, मालोबा मित्र मंडळ, चिंतामणी ग्रुप, साईराज प्रतिष्ठान, शंभूराजे युवा प्रतिष्ठान आदी सार्वजनिक गणेशमंडळांनी प्रतिष्ठापना केली.
परिसरातील पिलाणवाडी, डुबेवाडी, टेळेवाडी, दहिटणे, मिरवडी, मेमाणवाडी, पाटेठण, टाकळी भीमा, वडगाव बांडे, पानवली, कोरेगाव भिवर, वाळकी, पिंपळगाव, खामगाव, नांदूर, मिरवडी, सहजपूर, देलवडी, लडकतवाडी, उंडवडी, तांबेवाडी, खुटबाव, एकेरीवाडी, गाडोमोडी फाटा आदी गावांमध्ये पारंपरिक वाद्यात सर्व मंडळाचे पदाधिकाऱ्यांसह मंडळाचे कार्यकर्ते मिरवणुकीत सहभागी झाले होते.