राजगुरुनगरला कामगाराचा बसची धडक बसून मृत्यू

राजगुरुनगर, ता. १७ : पुणे- नाशिक महामार्गावरील राजगुरुनगर (ता. खेड) बाह्यवळणावर प्रवासी बसची धडक बसल्याने कामगाराचा मृत्यू झाल्याची घटना सोमवारी (ता. १७) पहाटे साडेपाच वाजता घडली. शंकर बबन काळे (वय ३५, मूळ रा. दावडी, सध्या रा. चव्हाणमळा, राजगुरुनगर) असे मृत्युमुखी पडलेल्या व्यक्तीचे नाव आहे.
पोलिसांनी दिलेल्या माहितीनुसार, शंकर काळे हे चाकण येथे बेंटलर ऑटोमोटिव्ह इंडिया प्रायव्हेट लिमिटेड कंपनीत कामाला होते. सोमवारी सकाळी साडेपाच वाजण्याच्या सुमारास कंपनीत कामास जाण्यासाठी ते बाहेर पडले. पुणे- नाशिक महामार्गाच्या बाह्यवळणावरील वाफगावकडे जाणाऱ्या पुलाच्या सेवा रस्त्यावर मोटारसायकल उभी करून ते महामार्ग ओलांडत होते. तेव्हा नाशिक बाजूकडून येणाऱ्या भरधाव प्रवासी बसची (क्र. एम‌एच १९ सीवाय ६६६१)
त्यांना धडक बसली.‌ त्यामुळे ते गंभीर जखमी झाले. चांडोली ग्रामीण रुग्णालयात दाखल केल्यानंतर डॉक्टरांनी त्यांना मृत घोषित केले.‌
अपघात झाल्यानंतर बस चालकाने बस तशीच चाकणच्या दिशेने दामटली. महामार्गावरच्या इतर वाहन चालकांनी पाठलाग करून त्यास चाकण येथे पकडले व खेड पोलिस ठाण्यात आणले. एकनाथ राजाराम माळी (वय ४७, रा. खरडई, ता. शिरपूर, जि. धुळे), असे बस चालकाचे नाव आहे. खेड पोलिसांनी त्याच्यावर गुन्हा दाखल करून त्याला अटक केली.