खेड हिट ॲंड रन प्रकरणात २४ तासांनतरही गुन्हा नाही

राजगुरुनगर, ता. १२ : येथे मंगळवारी (ता. ११) रात्री घडलेल्या ‘हिट ॲंड रन’ प्रकरणाला २४ तास उलटून गेल्यानंतरही गुन्हा दाखल केला नाही. भीमशक्ती संघटनेचे जिल्हाध्यक्ष विजय डोळस यांनी याप्रकरणी आंदोलनाचा इशारा दिल्यानंतर खेड पोलिसांनी गुन्हा दाखल करण्याचे आश्वासन दिले.
राजगुरुनगर (ता. खेड) परिसरात वाडा रस्त्यावर सातकरस्थळ ग्रामपंचायतीच्या हद्दीत एका बेधुंद मोटारचालकाने बेदरकारपणे गाडी चालवत तीन मोटरसायकलींना व पादचाऱ्यांना मंगळवारी रात्री आठ वाजण्याच्या सुमारास थोड्या थोड्या अंतरावर उडवले. त्यात या मोटरसायकलींवरील तीन जण गंभीर जखमी झाले होते. त्यांचे पाय मोडले असून, ते येथील एका खासगी रुग्णालयात उपचार घेत आहेत. इतर जखमींवरही उपचार सुरू आहेत. मात्र, एवढे गंभीर प्रकरण असूनही खेड पोलिस ठाण्यात गुन्हा दाखल झाला नाही. गुन्हा दाखल करण्यासाठी कोणीही फिर्याद देण्यास तयार नाही. त्यामुळे गुन्हा दाखल नाही, असे पोलिसांनी सांगितले.
ही गोष्ट भीमशक्ती संघटनेचे अध्यक्ष विजय डोळस यांना समजल्यानंतर त्यांनी त्या खासगी रुग्णालयात जाऊन जखमींची विचारपूस केली. त्यांना धीर दिला आणि याबाबत फिर्याद देणे आवश्यक असल्याचे त्यांना पटवून दिले. त्यानंतर ते खेड पोलिस ठाण्यात गेले आणि माहिती घेतली. फिर्याद दाखल नसल्याचे समजल्यावर त्यांनी आंदोलनाचा इशारा दिला.
‘या अपघातातील जखमी गरीब मजूर आहेत. ते अतिदक्षता विभागात उपचार घेत आहेत. त्यांच्यावर दबाव आहे म्हणून ते तक्रार देत नाहीत. एखाद्या प्रकरणात कोणी फिर्यादी नसेल, तर पोलिस स्वतःहून फिर्याद दाखल करू शकतात. त्यानुसार फिर्याद दाखल करावी आणि जखमी गरीब मजुरांना न्याय द्यावा,’ अशी भूमिका डोळस यांनी घेतली. त्यानंतर सहाय्यक पोलिस निरीक्षक प्रदीपसिंह सिसोदे यांनी पोलिसांकडून माहिती घेतली आणि डोळस व भीमशक्ती संघटनेच्या कार्यकर्त्यांना या प्रकरणी गुन्हा दाखल करण्याचे आश्वासन दिले.