होलेवाडी येथे अपघातात तरुणीचा मृत्यू

राजगुरुनगर, ता. २६ : राजगुरुनगर पाबळ रस्त्यावर होलेवाडी जवळील मांडवळा या वस्तीजवळ भरधाव मोटारीची दुचाकीला धडक बसली. या अपघातात महाविद्यालयीन विद्यार्थिनीचा मृत्यू झाला. ही घटना शुक्रवारी (ता. २५) रात्री साडेन‌ऊच्या सुमारास घडली. श्रेया संदीप खैरे ( वय १९, रा. चव्हाणमळा, पाबळरोड, साई रेसिडेन्सी, राजगुरुनगर; मूळ रा. खैरेनगर, पाबळ, ता. शिरूर) असे या अपघातात मृत्युमुखी पडलेल्या विद्यार्थिनीचे नाव आहे.
पोलिसांनी दिलेल्या माहितीनुसार, शुक्रवारी रात्री श्रेया खैरे दुचाकीवरून (एम. एच. १४ एफ वाय ३४२२ ) पाबळ बाजूने राजगुरुनगरकडे येत होती. त्याचवेळी होलेवाडी मांडवळाजवळच्या सीएनजी पंपासमोर राजगुरुनगर बाजूकडून येणाऱ्या टोयोटा कंपनीच्या मोटारीची (एम. एच. ४३ सीएम ५०८१ ) तिच्या स्कूटीला जोरदार धडक बसली. या भीषण अपघातात श्रेया मृत्युमुखी पडली. अपघाताबाबत श्रेयाचे आजोबा काळूराम सीताराम खैरे यांनी खेड पोलिस ठाण्यात फिर्याद दिली.‌ त्यावरून पोलिसांनी मोटारचालकावर गुन्हा दाखल केला आहे.