व्हॉट्सॲपवरील पुराव्यावरून महिलेस अटक

राजगुरुनगर, ता. ११ : राजगुरुनगर (ता. खेड) येथे चोरीचे दागिने गळ्यात घालून व्हॉट्सअपवर स्टेट्स ठेवल्यामुळे चोरी सापडल्याची घटना घडली. खेड पोलिसांनी स्टेट्सच्या पुराव्यावरून संशयित आरोपी महिलेला नुकतीच अटक केली आहे. शीतल अमोल वायदंडे (वय ३३, रा. पडाळवाडी राजगुरुनगर, मूळ रा. वडगाव हवेली, भीमकुंड, जि. सातारा) असे संशयित आरोपीचे नाव आहे.

खेड पोलिसांनी दिलेल्या माहितीनुसार, याप्रकरणी पूनम सत्यवान आदक (वय ३६, रा. आर्या रेसिडेन्सी, पडाळवाडी रोड, थिगळस्थळ, राजगुरुनगर, ता. खेड) यांनी फिर्याद दिली होती. त्यांच्यानुसार त्यांच्या वरच्या मजल्यावर संशयित आरोपी शीतल वायदंडे ही सन २०२१ मध्ये भाड्याने राहत होती. शीतल बरोबर पूनम यांची चांगली ओळख झाली व ओळखीतून मैत्री झाली. शीतल अधूनमधून पूनम यांच्या घरी येत जात होती. शीतलने पूनम यांनी सोन्याचे दागिने, घराच्या कपाटातील कप्प्यामध्ये एका स्टीलच्या डब्यामध्ये ठेवताना एकदा पाहिले. या दागिन्यांमध्ये सोन्याचे मंगळसूत्र, नेकलेस, कानातले जोड, टॉप्स, सोनसाखळी, अंगठ्या, मणी, कानातील फुले, वेल आणि बदाम अशा सुमारे अडीच लाख रुपये किमतीच्या दागिन्यांचा समावेश होता. त्यानंतर एक वर्षाने शीतल यांचे पतीसह शेजारच्या इमारतीत राहण्यास गेली. दरम्यान, मे २०२५ मध्ये पूनम यांनी मैत्रीण शीतल वायदंडे हिच्या बहिणीचे व्हॉट्सअप स्टेटस पाहिले. तेव्हा शीतल व तिच्या बहिणीच्या गळ्यात पूनम यांचे गहाळ झालेले सोन्याचे दागिने दिसून आले. त्यानंतर पूनम यांनी खेड पोलिस ठाण्यात तक्रार दिली. त्यांच्या तक्रारीवरून खेड पोलिसांनी गुन्हा दाखल करून संशयित आरोपी शीतल हिस अटक केली.