साठवणगृह तंत्रज्ञान कांद्यासाठी फायदेशीर

राजगुरुनगर, ता. ८ : ‘‘कांदा व लसूण संशोधन संचालनालय आणि कला बायोटेक प्रायव्हेट लिमिटेड यांच्या संयुक्त विद्यमाने विकसित केलेले आधुनिक कांदा साठवणगृह तंत्रज्ञान कांद्याच्या स्थिर बाजारपेठेसाठी फायदेशीर आहे,’’ असे मत राज्य कृषिमूल्य आयोगाचे अध्यक्ष पाशा पटेल यांनी येथे व्यक्त केले.

‌राज्यातील कांदा पिकाचे धोरण ठरविणे व विविध उपाययोजना सुचविणे या प्रयोजनासाठी पाशा पटेल यांच्या अध्यक्षतेखाली समिती गठित करण्यात आलेली असून, या समितीची राजगुरुनगर येथे गुरुवारी (ता.८) येथील कांदा व लसूण संशोधन संचालनालयात पार पडली. यावेळी ते बोलत होते.

कांदा व लसूण संशोधन संचालनालय आणि कला बायोटेक यांच्या संयुक्त विद्यमाने विकसित केलेल्या नियंत्रित वातावरण कांदा साठवणगृह प्रकल्पाची पटेल व अन्य सहभागींनी पाहणी केली. यावेळी या तंत्रज्ञानाचे सविस्तर सादरीकरण केले गेले. कांदा साठवणुकीसाठी पूर्वीपासून चालत आलेल्या कांदा चाळींमध्ये ३० ते ४० टक्के नुकसानीला शेतकऱ्यांना सामोरे जावे लागते. तसेच शीतगृहाचा वापर केल्यास साठवणुकीतून बाहेर काढलेल्या कांद्यास जलद गतीने कोंब येतात. म्हणून कांद्याला कोंब न येण्यासाठी  विकिरणाचा मारा करावा लागतो. याबाबी खूप खर्चिक आहेत. यावर उपाय म्हणून संचालनालय व कला बायोटेक यांनी नियंत्रित वातावरणात कांदा साठवण तंत्र विकसित केले आहे. यामध्ये तापमान २५ ते ३० डिग्री सेल्सिअस आणि आर्द्रता ६० ते ६५ टक्के राहण्यासाठी, तसेच हवा खेळती राहण्यासाठी उपाययोजना केलेल्या आहेत. त्यामुळे कांद्याच्या साठवणुकीत, चार ते सहा महिन्यापर्यंत कांद्याचे नुकसान १५ टक्क्यांपेक्षाही कमी आढळून आले आहे.

याप्रसंगी महाराष्ट्र राज्य कृषी पणन मंडळाचे कार्यकारी संचालक संजय कदम, सुहास काळे, संचालनालयाचे प्रमुख शास्त्रज्ञ डॉ. रामदत्ता, वरिष्ठ शास्त्रज्ञ डॉ. कल्याणी गोरेपती, डॉ. राजीव काळे, डॉ. भूषण बिबवे, केंद्रीय वखार महामंडळाचे महाव्यवस्थापक अजय जादू, डॉ. आर. बी. हिले, भीमाशंकर कोल्ड स्टोरेजचे संचालक बाळासाहेब सावंत, शेतकरी प्रतिनिधी दीपक पगार, निर्यातदार विकास सिंग आदी उपस्थित होते. डॉ. रामदत्ता यांनी अध्यक्षांचे स्वागत केले. सुहास काळे यांनी बैठकीची रूपरेषा मांडली. डॉ. राजीव काळे यांनी सूत्रसंचालन केले आणि आभार मानले.
03883