खेडमध्ये टाळमृदंगांच्या तालात प्रभातफेऱ्या

राजगुरुनगर, ता. १६ : खेड तालुक्यात स्वातंत्र्यदिन उत्साहाने साजरा करण्यात आला. विद्यार्थ्यांनी प्रभातफेऱ्या काढल्या. ठिकठिकाणी विद्युत रोषणाई केली होती. शासनाने संत ज्ञानेश्वर महाराज यांच्या ७५० वा जन्मोत्सव साजरा करण्याचे निर्देश दिले होते. त्यानुसार तालुक्यातील शाळा, विद्यालये, नगरपरिषदा, ग्रामपंचायतीपातळीवर स्वातंत्र्य दिनानिमित्त प्रभातफेरीत विद्यार्थ्यांनी वारकरी वेशभूषा केल्या होत्या. काही ठिकाणी टाळमृदुगांच्या तालात प्रभातफेऱ्या काढल्या. तसेच, ११ ऑगस्ट रोजी खेड तालुक्यातील पाईट परीसरातील कुंडेश्वर देवस्थानाकडे दर्शनासाठी निघालेल्या महिलांच्या टेम्पोला झालेल्या भीषण अपघातात मृत्युमुखी पडलेल्या महिलांना ध्वजवंदन समारंभानंतर अनेक गावांमध्ये आदंराजली वाहण्यात आली.
खेड तहसील कार्यालयाच्या प्रांगणात शासकीय झेंडावंदन उपविभागीय अधिकारी अनिल दौंडे यांच्या हस्ते झाले. यावेळी तहसीलदार प्रशांत बेडसे, निवासी नायब तहसीलदार चेतन मोरे, नायब तहसीलदार राम बीजे, रवींद्र मोरे, मनीषा खैरे आदी उपस्थित होते. या वेळी खेड पोलिस ठाण्याच्या पोलिसांनी संचलन केले. आणीबाणीत तुरुंगवास भोगलेल्या वसंत खेडकर, माधव कापरे, प्रकाश कुलकर्णी, मुकुंद दिवाण या चौघांचा मानपत्र देऊन सन्मान करण्यात आला.
आमदार बाबाजी काळे यांच्या हस्ते पाडळी ग्रामपंचायत येथे ध्वजवंदन केले. पुणे जिल्हा बँकेच्या आवारात आमदार दिलीप मोहिते यांच्या हस्ते ध्वजवंदन झाले. खेड बाजार समितीत सभापती विजयसिंह शिंदे यांनी ध्वज फडकवला. राजगुरुनगर सहकारी बँकेत अध्यक्ष सागर पाटोळे व उपाध्यक्ष अश्विनी पाचारणे यांनी ध्वजवंदन व पूजन केले.
हुतात्मा शिवराम हरी राजगुरू यांच्या जन्मस्थळ वाड्यावर झेंडावंदन वीरपत्नी सुनंदा थिगळे यांच्या हस्ते केले. खेड जिल्हा सत्र न्यायालयात जिल्हा न्यायाधीश ए. एस. सय्यद यांच्या हस्ते झेंडावंदन झाले. राजगुरुनगर नगरपरिषदेत मुख्याधिकारी मुख्याधिकारी अंबादास गर्कळ यांच्या हस्ते ध्वजवंदन केले. उपविभागीय पोलिस अधिकारी कार्यालयात उपविभागीय पोलिस अधिकारी अमोल मांडवे यांच्या हस्ते ध्वज फडकाविला.