प्रभाग रचनेचा नकाशा नागरिकांसाठी उपलब्ध

राजगुरुनगर, ता. १९ : राजगुरुनगर नगरपरिषदेच्या प्रभाग रचनेचा प्रारूप आराखडा सोमवारी प्रसिद्ध केला आली. प्रभाग रचनेचा नकाशा नागरिकांना पाहण्यासाठी उपलब्ध करून देण्यात आला आहे. एकूण १० प्रभाग करण्यात आले असून नऊ द्विसदस्यीय तर एक त्रिसदस्यीय प्रभाग असल्याने सदस्यसंख्या २१ झाली आहे.

या प्रारूप प्रभाग रचनेवर ३१ ऑगस्टपर्यंत हरकती व सूचना देता येणार आहेत. हरकती व सूचनांवर जिल्हाधिकाऱ्यांकडून प्राधिकृत अधिकारी नेमून सुनावण्या घेतल्या जातील. सुनावणीची तारीख नंतर कळविण्यात येईल. अंतिम प्रभागरचना २६ ते ३० सप्टेंबर दरम्यान प्रसिद्ध केली जाईल.
मागच्या कार्यकाळात नगरपरिषदेत १८ एकसदस्यीय प्रभाग होते, त्यामुळे १८ नगरसेवक होते. आता नऊ द्विसदस्यीय तर एक त्रिसदस्यीय प्रभाग असल्याने सदस्यसंख्या २१ झाली आहे. या २१ सदस्यांपैकी ११ जागा महिलांसाठी राखीव राहणार आहेत. अनुसूचित जाती व जमातीचे प्रत्येकी एक आरक्षण असणार आहे. मागील निवडणुकीत अनुसूचित जाती प्रवर्ग जागा महिलांसाठी आरक्षित होती, त्यामुळे या निवडणुकीत अनुसूचित जाती प्रवर्ग जागा अनुसूचित जाती सर्वसाधारणकरिता राखीव असेल. मागील निवडणुकीत अनुसूचित जमाती प्रवर्ग जागा, अनुसूचित जमाती सर्वसाधारणसाठी आरक्षित होती, त्यामुळे या निवडणुकीकरिता ही जागा अनुसूचित जमाती महिलेकरता आरक्षित राहील.‌ नागरिकांच्या मागास प्रवर्गासाठी सहा जागा राखीव आहेत. त्यांपैकी तीन महिलांसाठी राखीव राहतील.
एकूण मतदारसंख्या २८ हजार ५९२ आहे. त्यामुळे दोन सदस्यीय प्रभागांसाठी सरासरी २७२३ लोकसंख्येचा प्रभाग असेल. तर तीन सदस्यीय प्रभागासाठी सरासरी ४०८५ लोकसंख्येचा प्रभाग असेल. यामध्ये सोयीनुसार लोकसंख्या १० टक्के कमी किंवा जास्त करून प्रारूप प्रभाग रचना केली आहे.