अल्पवयीन मेहुणीवर दाजीचा बलात्कार

राजगुरुनगर, ता. १ : नात्याचा फायदा घेऊन दाजीनेच अल्पवयीन मेहुणीला फसवून पळवले आणि डांबून ठेवून बलात्कार केल्याची घटना खेड व शिरूर तालुक्यातील दोन गावांत घडली. याबाबत खेड पोलिसांनी अपहरण, डांबून ठेवणे आणि बलात्काराचा गुन्हा दाखल केला आहे. तसेच बाल लैंगिक अत्याचार प्रतिबंधक कायद्यानुसारही गुन्हा दाखल केला आहे. खेड पोलिसांनी दिलेल्या माहितीनुसार, याप्रकरणी सोळा वर्षीय पीडित मुलीने तक्रार दिली आहे. पिडिता खेड तालुक्यातील तिच्या गावी घरी असताना २७ ऑगस्ट रोजी मध्यरात्री तिचा दाजी छोटा टेम्पो घेऊन आला. तिला तिच्या आईच्या फोनवर फोन केला आणि ''कांद्याची गाडी खाली करायला पुण्याला जायचे आहे. तू माझे सोबत चल.'', असे म्हणून तिला बरोबर घेऊन पुण्याला गेला. पुण्याहून तिच्या गावी न आणता तिला शिक्रापूर (ता. शिरूर) येथे आधीच भाड्याने घेऊन ठेवलेल्या खोलीत घेऊन गेला. तेथे ३० ऑगस्टपर्यंत तिला डांबून ठेवून तुझ्या बहिणीला मारून टाकीन अशी धमकी देत त्याने तिच्यावर वेळोवेळी बलात्कार केला. शेवटी ३१ ऑगस्ट रोजी पिडितेचे आई, वडील व चुलते त्यांना शोधत तिथपर्यंत गेले, तेव्हा हा दाजी पळून गेला. त्यानंतर पीडिताने आई-वडिलांसोबत खेड पोलिस ठाण्यात येऊन फिर्याद दिली.