राजेगावच्या नीलेश यांची आरोग्य सेवकपदी निवड

राजेगाव, ता. १० : घरची आर्थिक परिस्थिती अडचणीची असल्याने ॲकॅडमीला प्रवेश घेता आला नाही. परंतु नाउमेद न होता ग्रामपंचायतीत लिपिकपदी काम करत उपलब्ध वेळेचा सदुपयोग करून घरीच एमपीएससी व सरळसेवेचा अभ्यास करून राजेगावच्या नीलेश चव्हाण यांनी आरोग्यसेवक पदाला गवसणी घातली.
नीलेशची नुकतीच सोलापूर जिल्हा परिषद सोलापूर अंतर्गत सरळ सेवेमधून शंकरनगर (ता. माळशिरस) येथे आरोग्य सेवकपदी निवड झाली आहे. नीलेशचे प्राथमिक शिक्षण राजेगाव आणि नायगाव येथील जिल्हा परिषद प्राथमिक शाळेत तर माध्यमिक शिक्षण राजेश्‍वर विद्यालय राजेगाव येथे पूर्ण केले. अकरावी व बारावी मलठण येथील गुरुदेव दादोजी कोंडदेव विद्यालयात केले. बीएची डिग्री बारामती येथील विद्या प्रतिष्ठानमध्ये घेतली. नंतर एमपीएससी व सरळ सेवेचा अभ्यास सुरू केला. परंतु शेतकरी कुटुंब आणि आर्थिक परिस्थिती अडचणीची असल्याने ॲकॅडमीला प्रवेश घेणं शक्य झाले नाही. त्यामुळे कुटुंबाला हातभार लावण्यासाठी राजेगाव ग्रामपंचायतीत लिपिक पदावर काम सुरू करून उपलब्ध वेळेचा सदुपयोग करून स्पर्धा परीक्षांचा अभ्यास सुरू केला.
राजेगाव ग्रामपंचायतीच्या वतीने नुकताच त्याचा सन्मान केला. या वेळी तंटामुक्त समितीचे अध्यक्ष शहाजी गुणवरे, सोपान चोपडे, रमेश जाधव, आजिनाथ पवणे, सुधीर नेपते, अजित शेख, दीपक जाधव, लालासाहेब भोसले, रफिक शेख, आशा वर्कर्स आदी उपस्थित होते

आर्थिक परिस्थितीने नाउमेद न होता अभ्यासामध्ये सातत्य ठेवल्यामुळे यश मिळाले. यशामध्ये आई-वडील व भावाचा मोलाचा वाटा आहे. त्यांच्या भक्कम साथीमुळे आणि जिद्द, चिकाटी आणि परिश्रम यामुळे यशस्वी झालो.
-नीलेश चव्हाण, राजेगाव (ता. दौंड)