अल्पभूधारक शेतकऱ्याच्या कन्येची स्वप्नपूर्ती

राजेगाव, ता. १५ : खडकी (ता. दौंड) येथील अल्पभूधारक शेतकऱ्याची कन्या आफ्रिन लतीफ शेख हिची बृहन्मुंबई महानगरपालिकेच्या कार्यकारी सहाय्यक अधिकारीपदी पाचवी रॅंक मिळवून निवड झाली आहे.
आफ्रिन हिचे वडील लतीफ शेख यांना फक्त दीड एकर जमीन असून, ते अल्पभूधारक शेतकरी आहेत. ते खडकी येथील पोल्ट्रीत काम करतात. आपल्या मुलांची स्वप्न पूर्ण करण्यासाठी त्यांनी प्रतिकूल परिस्थितीत दिवसरात्र एक करून कष्ट केले. आणि मुलीने ते स्वप्न साकार केले. त्यामुळे त्यांच्या डोळ्यातून आनंदाश्रू वाहू लागले. त्यांचे खडकी गावाच्या सांप्रदायिक क्षेत्रात सक्रिय योगदान असून, भजनी मंडळात ते पेटी, तबला वादन करून उत्कृष्ट गायन करतात.
शाळेत झालेल्या विविध विषयांवरील व्याख्याने ऐकून आफ्रिन प्रभावित झाली होते. त्यामुळे तिने लहानपणापासूनच क्लास वन अधिकारी होण्याचे स्वप्न मनात ठेवले. घरच्या आर्थिक विवंचनेने नाउमेद न होता या परिस्थितीतून बाहेर निघायचं असेल तर आपल्याला रिस्क घेऊन काहीतरी वेगळं करायला हवं, ही खूणगाठ मनाशी बांधून तिने प्रयत्न केले. तिने प्राथमिक आणि माध्यमिक शिक्षण गावातील जिल्हा परिषद शाळा आणि भैरवनाथ विद्यालयात, अकरावी व बारावीचे शिक्षण भिगवणच्या थोरात इंग्लिश मीडियम स्कूलमध्ये आणि पदवीचे शिक्षण स. प. महाविद्यालय पुणे येथे पूर्ण केले आहे.
ती गेली दोन वर्षे स्पर्धा परीक्षेची तयारी करत होती. पुणे येथील रयत प्रबोधिनीत स्पर्धा परीक्षा मार्गदर्शन घेतले असून, तिने महाराष्ट्र नागरी सेवा परीक्षा, सरळ सेवा परीक्षा अशा अनेक परीक्षा दिल्या आहेत‌. यापूर्वी तिची केंद्रीय डाक विभाग आणि ग्रामसेवक अशा पदावर निवड झालेली असून, मोठे स्वप्न असल्याने पुढील परीक्षा देण्याचा निर्णय घेतला होता.
आफ्रिन हिचा निवडीबद्दल राष्ट्रवादी कॉंग्रेस शरदचंद्र पवार पक्षाचे तालुकाध्यक्ष अप्पासाहेब पवार यांनी सन्मान केला. यावेळी सचिन काळभोर, अजित शितोळे, बापूसाहेब सकुंडे, तात्यासाहेब हिवरकर, संदीप काळे पाटील, राजूभाई पठाण, स्वप्नील शिंदे आदी उपस्थित होते.

तुमची शंभर टक्के मेहनत करायची तयारी असेल तर यशाला परिस्थिती आडवी येत नाही. माझ्या यशात आई-वडील, प्राथमिक शिक्षक, स्पर्धा परीक्षा मार्गदर्शक यांचे योगदान आहे.
- आफ्रिन शेख