स्वामी-चिंचोली ते राजेगाव रस्त्याची दुरवस्था

राजेगाव, ता. ९ : स्वामी-चिंचोली ते राजेगाव या रस्त्याच्या साइडपट्ट्या पावसामुळे पूर्णपणे वाहून गेल्याने रस्त्याच्या कडेला मोठे खड्डे पडले आहेत. त्यामुळे या ठिकाणी अपघात होण्याची शक्यता निर्माण झाली आहे.
या रस्त्यावरून दररोज वाहनांची वर्दळ असते. मात्र, रस्त्याच्या कडेला असलेल्या प्रवाशांच्या दृष्टीने संरक्षणासाठी महत्त्वाच्या असणाऱ्या साइडपट्ट्याच नष्ट झाल्याने वाहनचालकांसमोर अपघाताचे गंभीर संकट उभे राहिले आहे.
या समस्येकडे सार्वजनिक बांधकाम विभागाचे (PWD) अधिकारी दुर्लक्ष करत असल्याचे दिसून येत आहे. स्थानिक ग्रामस्थांनी आणि पदाधिकाऱ्यांनी याविषयी सार्वजनिक बांधकाम विभागाकडे वारंवार पत्रव्यवहार केला असून, अनेक वेळा तोंडी तक्रारी करण्यात आल्या आहेत. मात्र अद्याप कोणतीही ठोस कारवाई झाली नाही.
विशेष म्हणजे, साइडपट्ट्या तुटल्यामुळे रस्त्याच्या कडेला खड्डे पडले आहेत. पावसाच्या काळात दृष्यमानता कमी असल्याने किंवा रात्रीच्या वेळी रस्ता नीट दिसत नसल्यामुळे वाहनचालक थेट या दरीत कोसळण्याची शक्यता आहे. काही ठिकाणी आधीच किरकोळ अपघात झाल्याची माहितीही समोर आली आहे.
स्थानिक प्रशासनानेही याकडे दुर्लक्ष केल्यामुळे ग्रामस्थांमध्ये तीव्र नाराजी आहे. ‘रस्ते बांधताना दर्जा पाळण्यात आला नाही का?’ असा प्रश्‍न नागरिक विचारत आहेत. वेळेवर दुरुस्ती न झाल्यास याचा गंभीर परिणाम होऊ शकतो, असा इशाराही स्थानिकांनी दिला आहे.


सार्वजनिक बांधकाम विभागातील अधिकाऱ्यांच्या चुकीच्या कामामुळे रस्त्याच्या साइडपट्ट्या वाहून गेल्या आहेत. या विभागाकडून विविध नाहरकत प्रमाणपत्र देण्यात आल्याने ठेकेदारांनी रस्त्याच्या कडेला खोदकामे केली आहेत. त्यामुळे रस्ता वाहून गेला आहे. त्यामुळे सार्वजनिक बांधकाम विभागातील अधिकाऱ्यांकडून या कामाच्या रकमेची वसुली करावी असे निवेदन सार्वजनिक बांधकाम विभाग मंत्र्यांना देणार आहे.
अझरुद्दीन शेख, माजी सरपंच ग्रामपंचायत स्वामी-चिंचोली