इंदापुरात कोयत्याने वार; नऊ जणांविरुद्ध गुन्हा

इंदापूर, ता.८ : इंदापूर शहरात हॉटेलचे बिल देण्याच्या कारणावरून झालेल्या भांडण झाले. त्याचा राग मनात धरून जातिवाचक शिवीगाळ करत कोयत्या वार केले व लोखंडी रॉड व लाकडी दांडक्याने गंभीर मारहाण केल्याची घटना इंदापूर शहरात घडली. याबाबत विकास देवकर, चिकास देवकर आणि साधू पवार (सर्व रा. सरडेवाडी ता. इंदापूर) यांच्यासह आठ ते नऊ अज्ञात व्यक्ती विरोधात इंदापूर पोलिस ठाण्यात गुन्हा दाखल केला आहे.
याबाबत विवेक विनय मखरे (रा. टेंभुर्णी नाका, इंदापूर) यांनी दिलेल्या फिर्यादीवरून शुक्रवारी (ता.७) इंदापूर बायपास लगत असलेल्या हॉटेल पायल येथे बिल देण्याच्या कारणावरून शिवीगाळ केली. त्याचा राग मनात धरून शहरातील टेंभुर्णी नाका येथे तीन आरोपींसह आठ ते नऊ जणांनी हातातील कोयता, लोखंडी रॉड व लाकडी दांडक्याने जिवे मारण्याच्या उद्देशाने डोक्यात, हातावर वार करून पायालाही जबर मारहाण करीत जखमी केले. यावेळी फिर्यादीचा भाऊ केवल हा भांडणे सोडविण्यासाठी गेला असता त्यासही मारहाण करून जखमी केल्याचे फिर्यादिमध्ये नमूद केले आहे. दरम्यान, जखमींवर इंदापूर शहरातील उपजिल्हा रुग्णालयात उपचार सुरू आहेत. या घटनेचा पुढील तपास बारामतीचे उपविभागीय पोलिस अधिकारी गणेश इंगळे करीत आहेत.
-