मदनवाडी तलाव परिसरात अतिक्रमणे ‘जैसे थे’च

शिर्सुफळ : ता : ११ : सिद्धेश्वर निंबोडी (ता. बारामती) ग्रामपंचायतीच्या वतीने मदनवाडी तलाव व परिसरातील अतिक्रमणांबाबत जिल्हाधिकारी, सिंचन भवन, बारामती तहसील कार्यालयाला अनेकदा पत्रव्यवहार करून पाठपुरावा करून देखील अद्याप या ठिकाणचे अतिक्रमण हटविले गेले नाही.
अतिक्रमण काढण्यास विलंब होत असल्याने सरपंच संतोष सोनवणे यांनी उपोषणाचा इशारा देत जलसंपदा विभाग यांना अतिक्रमण हटविण्याची मागणी पत्राद्वारे केली होती. यानंतर कार्यकारी अभियंता खडकवासला, पुणे यांनी खडकवासला सिंचन उपविभाग, इंदापूर यांना तलावातील अतिक्रमणांची ड्रोनद्वारे मोजणी करून अतिक्रमणे हटविण्यास विभागाला आदेश दिलेले होते. मात्र, पाटबंधारे विभागाकडून याकडे दुर्लक्ष केले जात असल्याचा आरोप ग्रामस्थांनी केला आहे. तलावात अतिक्रमण केलेल्या सर्व शेतकऱ्यांना नोटिसा काढण्यात आल्या आहेत; परंतु अतिक्रमण केलेल्या शेतकऱ्यांवर कारवाई केली गेली नाही.

मोजणीसाठी लागणारी अमानत रक्कम आम्ही भरण्यास तयार आहे. भूमी अभिलेख विभागाला आमच्याकडून मागील सहा महिन्यांपासून दोन वेळा पत्रव्यवहार केला गेला आहे. या पत्रव्यवहाराला भूमी अभिलेख विभागाने आम्हाला अद्याप कोणताही निर्णय दिला नाही.
- पंकज हुलसुरे, सहाय्यक अभियंता खडकवासला प्रकल्प सिंचन व्यवस्थापन, इंदापूर उपविभाग

आम्ही २०१७ पासून पाठपुरावा करत असतानादेखील यावर कोणतीही कारवाई झाली नाही. जलसंपदाच्या अधिकाऱ्यांनी तलावातील अतिक्रमण न काढल्यास उच्च न्यायालयात अधिकाऱ्यांच्या विरोधात रिट पिटिशन दाखल करणार आहोत. अतिक्रमण काढण्याबाबत वरिष्ठ अधिकाऱ्यांच्या आदेशाला केराची टोपली दाखवत आहेत.
- संतोष सोनवणे, सरपंच, सिद्धेश्वर निंबोडी