रोजंदारीवरील कामगारांना ‘सोमेश्‍वर’चा गोड निर्णय

सोमेश्वरनगर, ता. ९ : येथील सोमेश्वर सहकारी साखर कारखान्याच्या संचालक मंडळाने सलग सात वर्ष रोजंदारी (कंत्राटी) पद्धतीने कार्यरत असलेल्या कामगारांना आता कारखान्याच्या सेवेत घेण्याचा निर्णय घेतला आहे. त्यामुळे आता ८९ रोजंदारी मजूर हे ‘साखर कामगार’ बनणार आहेत, अशी माहिती सोमेश्वर कारखान्याचे अध्यक्ष पुरुषोत्तम जगताप यांनी दिली.
अनेक वर्षे कारखान्यात मजूर म्हणून राबणाऱ्यांना मागील काही महिन्यांपासून संचालक मंडळ कायम सेवेत घेण्याचा विचारात होते. तसेच, साखर कामगार संघटनांनीही आग्रही मागणी केली होती. हा निर्णय विधानसभा निवडणुकीआधी होणार की नंतर ही उत्सुकता होती. संचालक मंडळाने बुधवारी (ता. ९) झालेल्या मासिक सभेत मध्यम मार्ग काढत सात वर्षे काम केलेल्या रोजंदारी कामगारांसाठी दिवाळी भेट दिली आहे. त्यामुळे ८९ रोजंदारी कामगार आता टप्प्याटप्प्याने कारखान्याच्या कायम सेवेत समाविष्ट केले जाणार आहेत.
व्यवस्थापनाने दिलेल्या माहितीनुसार, ८९ रोजंदारी कामगारांना ४०० ते ४५० रुपये दैनंदिन पगार होता. त्यांना आता कारखान्याच्या हजेरी पत्रकावर आणि एकत्रित पगारावर घेतले जाणार आहे. सुरवातीला आधीपेक्षा पगारात थोडीफार वाढ होईल. त्यानंतर स्टाफिंग पॅटर्ननुसार टप्प्याटप्प्याने कायम सेवेत समाविष्ट केले जाणार आहे. कारखान्याची वेतन क्षमता, प्रायव्हेट फंड रक्कम भरण्याची क्षमता, स्टाफिंग पॅटर्न या बाबींचा विचार करून पुढील कार्यवाही केली जाणार.