लांडग्यांच्या टोळीकडून तीन बोकड, शेळी ठार

सोमेश्वरनगर, ता. ३१ : कोऱ्हाळे खुर्द (ता. बारामती) येथील तुकाराम गणपत खोमणे या शेतकऱ्याच्या शेळ्यांच्या गोठ्यावर बुधवारी (ता. ३०) मध्यरात्रीच्या सुमारास लांडग्यांच्या टोळीने हल्ला केला. यामध्ये तीन बोकड आणि एक शेळी मृत्यूमुखी पडली. या घटनेत बिबट्या असावा, असा संशय शेतकरी व्यक्त करत होते, मात्र हा लांडग्यांचाच हल्ला असल्याचे वनविभागाने स्पष्ट केले.
कोऱ्हाळे खुर्दमधील लिफ्टवस्ती येथे खोमणे यांचा आफ्रीकन बोर जातीच्या शेळ्यांचा गोठा आहे. बुधवारी मध्यरात्रीनंतर लांडग्यांनी साडेसहा फुटी तारेच्या संरक्षक जाळीवरून गोठ्यात उड्या घेतल्या. या हल्ल्यात तीन बोकडांचा बळी घेतला. तर लांडग्यांच्या भीतीनेच एका शेळीचा घाबरून मृत्यू झाला. वडगाव निंबाळकर पशुसंवर्धन केंद्रातील अधिकारी अवधूत जोशी यांनी शवविच्छेदन केले, तर वनविभागाच्या पथकाने पंचनामा केला. बोर जातीच्या बोकडांना मोठी किंमत असल्याने शेतकऱ्याचे हजारो रुपयांचे नुकसान झाले आहे.
वनपाल जहीर शेख म्हणाले, ‘‘आमच्या पथकाने घटनास्थळी पाहणी केली असून, सदर हल्ला तरस किंवा बिबट्याचा नसून, लांडग्याचाच असल्याचे निष्पन्न झाले आहे. वनविभागाच्या धोरणानुसार नुकसानभरपाईचा प्रस्ताव पाठवण्यात आला आहे.’’