श्रावणसरी झेलत भाविकांकडून सोमेश्‍वराचे दर्शन

सोमेश्‍वर, ता. १८ : सर्वत्र भक्तांची तुडुंब गर्दी... दिवसभर न्हाऊ घालत असलेल्या श्रावणसरी... सोमेश्‍वर महाराज की जय असा सुरू असलेला जयघोष या पार्श्‍वभूमीवर करंजे (ता. बारामती) येथील श्री क्षेत्र सोमेश्‍वर देवस्थान येथे उत्साहात श्रावणी यात्रा पार पडली. या निमित्ताने सोमेश्‍वर महाराजांच्या पालखीचा सती मालुबाईंच्या भेटीचा नयनरम्य सोहळाही पार पडला. दिवसभरात दर्शनासाठी भाविकांनी हजेरी लावली.
शेवटच्या श्रावणी सोमवार यात्रेत सलग सुट्ट्यांमुळे राज्याच्या विविध भागांतील शिवभक्त आणि विशेषतः मुंबई आणि कोकण भागातील कोळी बांधव आले होते. मध्यरात्री प्रांताधिकारी वैभव नावडकर, राजेंद्र मोहिते यांच्या हस्ते सोमेश्‍वराच्या पिंडीची महापूजा पार पडली. याप्रसंगी संभाजी होळकर, यादवराव शिंदे, अनंत मोकाशी, विपुल भांडवलकर उपस्थित होते.
सकाळी नऊ वाजता आरतीनंतर सोमेश्‍वराची प्रतिमा ठेवलेली पालखी सती मालुबाईंच्या भेटीसाठी मार्गस्थ झाली. पारंपरिक वाद्यांच्या तालावर, गुलालाची उधळण करत पालखी सोहळा बारा वाजता मालुबाई भेटीस पोचला. भाविकांच्या उपस्थितीत आरती पार पडली. कोऱ्हाळे खुर्द, कोऱ्हाळे बुद्रुक व जळगाव सुपे या गावातील मानकरी खोमणे कुटुंबीयांनी देवाला शेला-पागोटे आणि मालुबाईस साडीचोळी अर्पण केली. यानंतर पालखीच्या घोड्यांचे नृत्य, फुगडी असे खेळ पार पडले.
बारामती आगाराने विशेष बस दिल्या तर वीज कंपनीने अखंडित वीजपुरवठा केला.
देवस्थान समितीने भक्तनिवास, पार्किंग, पिण्याचे पाणी, दर्शन रांगेसाठी मंडप अशा सोयीसुविधा दिल्या. होळ प्राथमिक आरोग्य केंद्र, साई सेवा हॉस्पिटल यांच्या वतीने मोफत औषधोपचार करण्यात आले. वडगाव निंबाळकर पोलिसांनी चोख बंदोबस्त ठेवला होता. स्टेशनरी, सौंदर्यप्रसाधने, हॉटेल, मिठाई, हार-फुले, खेळणी, पाळणे अशा विविध दुकानांनी परिसर गजबजून गेला होता. पावसामुळे काहीसा व्यवसायिकांना फटका बसला.