उशिरा तुटलेल्या उसाला वाढीव अनुदान द्या

सोमेश्वरनगर, ता. ११ : सोमेश्वर कारखान्याच्या कार्यक्षेत्रात ऊसतोड करण्यासाठी तोडणी यंत्रणा पाच ते दहा हजार रुपये उकळत आहेत. आतापर्यंत कारखान्याने काहीही कारवाई केलेली नाही. कारखान्याने नुकसानीची जबाबदारी घेऊन उशिराने म्हणजे फेब्रुवारीत तुटलेल्या उसाला प्रतिटन दोनशे तर मार्चमध्ये तुटलेल्या उसाला तीनशे रुपये अनुदान द्यावे, अशी मागणी शेतकरी कृती समितीचे नेते सतीश काकडे यांनी केली सोमेश्वरनगर (ता. बारामती) येथे केली आहे.

सोमेश्वर साखर कारखान्याने फेब्रुवारी, मार्च व एप्रिलमध्ये गाळपास येणाऱ्या अनुक्रमे १००, २०० व ३०० रुपये प्रतिटन अनुदान जाहीर केले आहे. परंतु नुकतेच वृत्तपत्राच्या बातमीतून कारखान्याने मार्चच्या तिसऱ्या आठवड्यात कारखाना बंद होणार असल्याचे जाहीर केले आहे. असे असेल तर एप्रिलमध्ये जाहीर केलेले ३०० रुपये अनुदान ही फसवी आणि सभासदांचा दिशाभूल केलेलीच योजना आहे. केवळ प्रसिद्धी म्हणून किंवा निवडणूक डोळ्यापुढे ठेवून दिशाभूल करण्याऐवजी तोडणी यंत्रणेच्या नुकसानीतून काहीशी भरपाई म्हणून फेब्रुवारी व मार्चचे अनुदान वाढवून द्यावे.
फेब्रुवारीमध्ये २ लाख ६३ हजार टन उस गाळपास आला. १०० रुपये प्रतिटनाप्रमाणे दोन कोटी ६३ लाख रुपये सभासदांना जादा मिळाले. मात्र, सभासदांचे ऊसतोडीसाठी प्रतिएकर ४ ते ८ हजार रुपये तोडणी यंत्रणेने उकळले. त्यानुसार सभासदांचे जवळपास दोन कोटी ७५ लाख रुपयांचे नुकसान झाले. तसेच मार्च महिन्यामध्ये आजपर्यंत ६५ हजार टन उस गाळप झाला असून सभासदांना २०० रुपये प्रतिटनाप्रमाणे १ कोटी ३० लाख रुपये अतिरिक्त मिळाले. परंतु सभासदांचे ऊसतोडीसाठी प्रतिएकर पाच ते १० हजार रुपये तोडणी यंत्रणेने घेतले.

सतीश काकडे यांच्या मते
- सभासदांचे १ कोटी २० लाख रुपयांचे नुकसान
- दोन-दोन शेती अधिकारी, अध्यक्ष, संचालक मंडळ यांचे नियंत्रणच नाही.
- संबंधित वाहतूकदार व यंत्रणेवर कारवाई करावी
- सभासदांना फेब्रुवारीचे आणि मार्चचे अनुदान वाढवून द्यावे

कार्यक्षेत्रात खूप ऊस उपलब्ध आहे, असे भासविल्याने सभासदांनी विस्तारवाढीला मंजुरी दिली. पण गेली दोन वर्षे कारखान्यास गेटकेन ऊस गाळपासाठी आणावा लागत आहे. चालू हंगामात ९५ हजार टन गेटकेन प्राधान्याने आणला आणि सभासदांचा ऊस उशिरा तोडावा लागला. यामुळे सभासदांच्या जखमेवर मीठ चोळले.
- सतीश काकडे, शेतकरी कृती समितीचे नेते