पावसाअभावी शेतकरी चिंतेत

शेटफळगढे, ता. १६ : परिसरात प्रतिवर्षी मे महिन्यात पडणारा मॉन्सूनपूर्व पाऊस यावर्षी पडला नाही. अशातच जून महिन्याचा पहिला पंधरवडा संपला, तरी पावसाचा थेंबही न पडल्याने शेतकरी चिंताग्रस्त झाले आहेत.
परिसरात पाऊस नसल्याने विहीरी व कूपनलिका कोरड्या पडू लागल्या आहेत. त्यामुळे शेतात सध्या असलेला ऊस व मका, कडवळ यांसारखी हिरव्या चाऱ्याची पिके जळण्याच्या मार्गावर आहेत. तसेच, पिण्याच्या पाण्याचीही पाणी टंचाई जाणवू लागली आहे. पशुधनांना हिरवा चारा मिळण्यासाठी म्हसोबावाडी येथील शेतकरी बागायत भागातून गुंठेवारीवर मका व ऊस यासारखी पिके दुभत्या जनावरांच्या चाऱ्यासाठी घेऊन येत आहेत. मॉन्सूनपूर्व व नियमित पाऊस पडेल, या आशेवर शेतकऱ्यांनी खरीप हंगामाच्या पेरणीसाठी मशागतपूर्व कामे करून ठेवली आहेत. मात्र, पाऊस नसल्याने परिसरातील शेतकरी चिंतेत पडला आहे. त्यामुळे शेतकऱ्यांच्या नजरा आता पावसाकडे व हवामान खात्याच्या अंदाजाकडे लागल्या आहेत.