इंदापुरातील कालव्यालगतच्या शेतकऱ्यांत नाराजी

शेटफळगढे, ता ८ : खडकवासला कालव्याचे उन्हाळी आवर्तन सुरू होताच जिल्हाधिकारी जितेंद्र डुडी यांनी कालव्यालगतच्या रोहित्रांचा वीजपुरवठा बंद करण्याचे आदेश दिले आहेत. यामुळे इंदापूर तालुक्यातील शेतकऱ्यांत कमालीची नाराजी पसरली आहे. या निर्णयामुळे शेतकऱ्यांच्या तोंडचे पाणी पळाले आहे.

फेब्रुवारी महिन्यामध्ये झालेल्या कालवा सल्लागार समितीमध्ये शेतीसाठी दोन आवर्तन देण्याचे जाहीर झाले होते. त्यानुसार पहिले आवर्तन सुरू असतानाही जलसंपदा विभागाचे अधिकारी कालव्यावरील अवलंबून असलेल्या इंदापूर तालुक्यातील शेतकऱ्यांना पाणी उपसण्यासाठी मज्जाव करत होते. शेतकऱ्यांनी आपली पिके जगण्यासाठी धडपड केली परिणामी कर्मचाऱ्याची वादही झाले. आता, मात्र आवर्तनाचे पाणी इंदापूर तालुक्यात पाणी येताच जलसंपदा विभागाच्या अधिकाऱ्यांनी जिल्हाधिकारी यांना पाच मे रोजी लेखी निवेदन देऊन कालव्यालगतचे रोहित्र बंद करण्याचे आदेश करण्याची विनंती केली. त्यानुसार जिल्हाधिकारी यांनी सात मे रोजी कालव्यालगतचे रोहित्र बंद करण्याच्या आदेश महावितरण कंपनीच्या, हवेली केडगाव, बारामती विभागाला दिले आहेत. त्यामुळे महावितरण कंपनीच्या वतीने कालव्यालगतचे रोहित्र बंद करण्याची कारवाई सुरू केल्याने शेतकरी वर्गामध्ये नाराजी पसरली आहे.
जलसंपदा विभाग ‘हे पाणी शेतीसाठी नाही हे पाणी फक्त पिण्यासाठी आहे’ असे सांगत असल्याने शेतकऱ्यांनी शेती कशी करायची असा सवाल आहे शेतकरी करीत आहे.

महावितरणकडून आवर्तन काळात रोहित्र बंद करणं हे बेकायदेशीर आहे. शेतकरी हा महावितरणचा ग्राहक आहे. मग तो घरगुती असो कृषीपंपाचा! ग्राहकांना व्यवस्थित सेवा देणे महावितरणचे कर्तव्य आहे. जलसंपदा खात्याच्या सांगण्यावरून स्वतःच्या ग्राहकांना ऐनवेळेस वेठीस धरणं चुकीचं आहे. आवर्तनकाळात जलसंपदा खात्याच्या सांगण्यावरून वीज बंद ठेवून आमच्यावर अन्याय करणार असाल तर तो खपवून घेतला जाणार नाही. जिल्हाधिकारी यांचे आदेश मान्य करू पण इंदापूर तालुक्यात पाणी आल्यावरच केलेले आदेश कसे दिले जातात हाही प्रश्न आम्हा शेतकऱ्यांना सतावत आहे.
- विजय गावडे, खडकवासला प्रकल्पग्रस्त शेतकरी

कालव्यालगतच्या रोहित्रावर विहिरीवरील विद्युत पंप आहेत त्यामुळे विद्युत पुरवठा खंडित करताना विहिरीच्या विद्युत पंपाची महावितरणने सोय करावी व या पुढील काळात विद्युत पंपाचे वीज बिल जलसंपदा विभाग यांच्याकडून वसूल करावे शेतकऱ्यांना वीज बिल मागू नये.
- यशवंत केकाणे, शेतकरी निरगुडे