निरगुडेमध्ये कालवा दुरुस्ती अंतिम टप्प्यात

शेटफळगढे, ता, १९ : मे महिन्यात झालेल्या अतिवृष्टीत इंदापूर तालुक्यातील निरगुडे येथे फुटलेल्या खडकवासला कालव्याच्या दुरुस्तीचे काम अंतिम टप्प्यात आले आहे. इंदापूर तालुक्यातील तरंगवाडी तलावासह अन्य तलाव भरण्यासाठी कालव्यातून लवकरच पाणी येणार आहे. सध्या धरण क्षेत्रात पावसाचे प्रमाण चांगले असून खडकवासला धरणातून मुळा मुठा नदीत पाणी सोडले जात आहे. मात्र गेल्या काही दिवसांपासून इंदापूर तालुक्यात कालवा नादुरुस्त असल्याने तालुक्यातील कालव्याला पाणी सोडले जात नाही. मात्र येत्या काही दिवसातच कालवा दुरुस्ती पूर्ण केली जाणार आहे. मे महिन्यात झालेल्या अतिष्टीमुळे निरगुडे परिसरात तलाव फुटून तलावाचे पाणी कालव्यात शिरल्याने खडकवासला कालवा निरगुडे गावाजवळ फुटला होता. गेल्या काही दिवसांपासून युद्ध पातळीवर कालवा दुरुस्तीचे काम जलसंपदा विभागाच्या वतीने सुरु आहे. आता ते काम पूर्णत्वास गेले असून येथे आठ दिवसात काम पूर्ण करण्याचा मानस जलसंपदा अधिकाऱ्यांनी ‘सकाळ’शी बोलताना व्यक्त केला.

सध्या तालुक्यात पावसाने दडी मारलेली आहे. परंतु मे महिन्यामध्ये खडकवासला कालवा व नीरा डावा कालवा फुटला होता. नीरा डावा कालवा तत्काळ दुरुस्त करण्यात आला. तसा खडकवासला कालवा अद्याप दुरुस्त झालेला नाही. खडकवासला धरणातून नदीपात्रात पाणी सोडून देण्यात आले आहे. हे जास्तीचे पाणी उजनी धरणात येत आहे. उजनी धरणातून पाणी पुढे नदीपात्रात सोडून दिले आहे. हे पाणी वाया जात असून कालव्याचे काम तत्काळ करून कालव्याला आवर्तन दिल्यास सदर पाण्याचा शेतकऱ्यांना उपयोग होईल. इंदापूर तालुक्यातील तलाव बंधारे भरता येणे शक्य आहे. त्यामुळे शेतकऱ्यांच्या शेतीच्या पाण्याचा प्रश्‍न सुटेल.
- विजय गावडे, लाभधारक शेतकरी, खडकवासला

खडकवासला कालवा निरगुडे गावाजवळ अतिवृष्टीत कालवा फुटला होता. रात्रंदिवस दुरुस्तीचे काम सुरू असून येथे आठवड्यात ते काम पूर्ण करून इंदापूर तालुक्यातील तरंगवाडी तलावासह अन्य तलावात कालव्याद्वारे पाणी सोडण्याचे नियोजन केले जाणार आहे.
पंकज हुलसुरे, उपविभागीय अधिकारी, जलसंपदा विभाग, इंदापूर