इंदापुरात बाजरीच्या पेरणीत घट

शेटफळगढे, ता. २३ : इंदापूर तालुक्यात गेल्या वर्षीच्या तुलनेत बाजरीच्या पेरणीत ३८ टक्क्याने घट झाली आहे. तर मक्याच्या पेरणीत तीन हजार दोनशे पाच हेक्टर ने वाढ झाली आहे.
तालुक्यात खरिपाची पेरणी झाली असून, यंदा शेतकऱ्यांनी मका, आणि ऊस या पिकाला अधिक पसंती दिली आहे. मे महिन्यामध्येच पावसाळ्याच्या सर्व सरासरी पावसाने ओलांडल्याने शेतकऱ्यांनी आडसाली उसाच्या लागणीकडेही लक्ष दिले आहे गेल्या वर्षीच्या तुलनेत ३२० टक्क्यांनी वाढ झाली आहे आडसाली उसाची लागवड ऑगस्ट आखेपर्यंत केली जाते मात्र २० जुलै पर्यंतच २५९५ हेक्टर आडसाली उसाची लागवड झाली आहे. त्यामुळे ऑगस्ट महिना अखेरीपर्यंत या क्षेत्रामध्ये अधिकची वाढ होईल.
बाजरीकडे मात्र शेतकऱ्यांनी पाठ फिरविल्याचे दिसते. पावसाळ्याच्या सुरुवातीलाच पावसाने दमदार हजेरी लावली असली, शेतात वापसा कंडीशन नसल्याने पेरण्या रखडल्या होत्या. मात्र, पावसाने आता अनेक दिवसापासून उघडीत दिल्याने शेतकऱ्यांचा कल मका आणि ऊस या पिकाकडे वळल्याचे चित्र आहे . गेल्या वर्षी बाजरीचे १०८८ हेक्टर क्षेत्रावर पेरणी झाली होती यंदा मात्र त्यामध्ये घट होऊन केवळ ७४० हेक्टर क्षेत्रावर पेरणी झाली आहे तसेच गेल्या वर्षी चारा व पिकासाठी १७७७९ हेक्टर क्षेत्रावर पेरणी झाली होती यंदा मात्र २०९८४ हेक्टरवर मक्याची पेरणी झाली आहे.

खरीप हंगामाच्या सुरुवातीला तालुक्यात पावसाने दमदार हजेरी लावली त्यामुळे मका आणि ऊस या पिकाकडे शेतकरी वळाला आहे. तसेच पशुधनाच्या संख्या तालुक्यात अधिकची असल्याने मका हे पीक उत्पन्नाबरोबरच चाऱ्यासाठी महत्त्वाची ठरते त्यामुळे शेतकरी मुरघास करण्याकडे भर देतात त्यामुळे मक्याच्या क्षेत्रात दिवसेंदिवस वाढ होत चालली आहे.
- किरण पिसाळ, प्रभारी तालुका कृषी अधिकारी इंदापूर

33662