हरित काऱ्हाटीसाठी ग्रामस्थांचा पुढाकार

सुपे, ता. २८ : काऱ्हाटी (ता. बारामती) गाव हद्दीत वृक्षारोपण कार्यक्रमांतर्गत आसामी तलाव परिसरात सुमारे दोन हजार झाडांची लागवड करण्यात आली. यात देशी, फळझाडे व आयुर्वेदिक रोपांचा समावेश आहे.
अमेरिकेच्या ‘इको लॅब’ व ‘से ट्रीज’ या स्वयंसेवी संस्थेच्या माध्यमातून हा कार्यक्रम झाला. झाडांना ठिबक सिंचनाद्वारे पाणी देण्याची व्यवस्था करण्यात आली आहे. तसेच, संवर्धनासाठी संस्थेचे १२० स्वयंसेवक, १०० ग्रामस्थ आणि भूजल मित्रांनी श्रमदान केले. दरम्यान, या वेळी कोनशिलेचे अनावरण झाले. दरम्यान, संस्थेच्यावतीने तलावातील पाणी पातळी मोजण्यासाठी मोजपट्टी बसवण्यात आली. दोन हजार झाडे वाढल्यानंतर तसेच तलावातील पाण्यामुळे हा परिसर हरित होणार आहे. याप्रसंगी तहसीलदार गणेश शिंदे, गटविकास अधिकारी किशोर माने, तालुका कृषी अधिकारी सचिन हाके, ‘इको लॅब’चे प्रमुख गिरीश कुमार, ‘से ट्रीज’चे राज्यप्रमुख शशांक, चैतन्य जोशी, सरपंच दीपाली लोणकर, ग्रामपंचायत अधिकारी नीलेश धारकर उपस्थित होते. वसतीगृह विद्यालयाच्या लेझीम पथकाचे सादरीकरण झाले.

ग्रामस्थांच्या जिद्द, चिकाटीचे कौतुक
ग्रामस्थांनी गेल्या तीन-चार वर्षांपासून गावच्या परिसरात ‘पाणी आडवा, पाणी जिरवा’ याविषयी श्रमदानातून कामे केली. त्यामुळे गावाला जिल्हा व राज्य पातळीवरील भूजल ग्रामस्पर्धेत पहिला क्रमांक मिळून सुमारे दीड कोटींचे बक्षीस मिळाले. गावात एकजूट असेल तर अशी कामे करता येतात. गावाने अशीच एकजूट ठेवावी. अशा शब्दात उपस्थित अधिकाऱ्यांनी गावकऱ्यांच्या कामाचे कौतुक केले.