शेतजमीन वाटपावरून न्हावऱ्यात हाणामारी

शिरूर, ता. ६ : शेतजमीन वाटपाच्या कारणावरून दोन कुटुंबातील वादाचे पर्यवसान जोरदार हाणामारीत झाले. न्हावरे (ता. शिरूर) येथे एका कुटुंबाने दुसऱ्या कुटुंबावर केलेल्या हल्ल्यात महिलेसह दोनजण जखमी झाले. हल्लेखोर कुटुंबातील लोकांनी दुसऱ्या कुटुंबाला चेंदामेंदा करण्याची धमकी दिल्याने खबरदारीचा उपाय म्हणून पोलिसांनी काहीजणांना ताब्यात घेतले आहे.
महेश हनुमंत देशमुख (रा. न्हावरे) यांनी दिलेल्या फिर्यादीवरून शिरूर पोलिस ठाण्यात त्रिंबक दादाभाऊ हिंगे, कमल त्रिंबक हिंगे, यशश्री सचिन हिंगे व साधना शंकर देशमुख (सर्व रा. न्हावरे) यांच्याविरूद्ध बुधवारी मारहाणीचा गुन्हा दाखल झाला. पोलिसांनी दिलेल्या माहितीनुसार, महेश देशमुख यांचा शेजारी राहणारे त्रिंबक हिंगे यांच्याशी गेल्या काही दिवसांपासून शेतजमिनीच्या वाटपाच्या कारणावरून वाद होता व त्यावरून त्यांच्यात कायमच धुसफूस व्हायची. मंगळवारी (ता. ३) सायंकाळच्या सुमारास महेश देशमुख व त्यांच्या कुटुंबातील इतर सदस्य शेतात असताना त्रिंबक हिंगे व त्यांच्या कुटुंबातील सदस्यांनी हल्ला केला. कमल हिंगे हिने उसाच्या टिपऱ्याने महेश देशमुख यांच्या पाठीवर मारहाण केली. साधना देशमुख व त्रिंबक हिंगे यांनी महेश देशमुख यांची बहीण रूपाली हनुमंत देशमुख व मावस बहीण प्रियांका बाळासाहेब जगदाळे यांना केसाला धरून खाली पाडले व लाथाबुक्क्यांनी बेदम मारहाण केली. त्रिंबक हिंगे याने महेश देशमुख यांची आई मंदा हनुमंत देशमुख यांच्या डोक्यात काठी घालण्याचा प्रयत्न केला. मात्र, त्यांनी हात मध्ये घेतल्याने त्यांच्या हाताला गंभीर दुखापत झाली. प्रियांका हिच्याही डोक्यात त्याने काठी घातली.
दरम्यान, आसपासचे लोक जमा झाल्यावर हल्लेखोर निघून गेले व जाताना, ‘पुन्हा आमच्या नादाला लागलात तर तुमचा चेंदामेंदा करून टाकू,’ अशी धमकी दिली. या घटनेची माहिती मिळताच शिरूर पोलिस ठाण्याच्या पथकाने घटनास्थळी धाव घेतली. अनुचित प्रकार टाळण्यासाठी पोलिसांनी खबरदारीच्या उपाययोजनांतर्गत काहीजणांना ताब्यात घेतले. सहायक फौजदार राजेंद्र बनकर पुढील तपास करीत आहेत.