महिलांचे दागिने चोरणाऱ्या टोळीतील एकास अटक

शिरूर, ता. १२ : भरधाव दुचाकीवरून येत महिलांच्या गळ्यातील सोनसाखळी हिसकावणाऱ्या किंवा दुकानदार महिलांशी खरेदीच्या बहाण्याने बोलत त्यांच्या गळ्यातील गंठण चोरून पळून जाणाऱ्या दोघांच्या टोळीतील एकाला पकडण्यात पोलिसांना यश आले. स्थानिक गुन्हे शाखा व रांजणगाव एमआयडीसी पोलिस पथकाने केलेल्या या कारवाईत अशा प्रकारचे आठ गुन्हे उघडकीस आले असून, सुमारे दहा लाख रुपयांचे सोन्याचे दागिने जप्त केले.
मारुती ऊर्फ गोविंद रामनाथ आंधळे (वय ३८, रा. लिंबोडी, पो. देवी निमगाव, ता. आष्टी, जि. बीड) असे अटक केलेल्या चोरट्याचे नाव असून, त्याने त्याचा साथीदार शरद बापू पवार (रा. लोणी सय्यदमीर, ता. आष्टी) याच्या मदतीने हे गुन्हे केल्याची कबुली दिली आहे.
शिरूर शहर व परिसर, रांजणगाव गणपती, शिक्रापूर या परिसरात सोनसाखळी चोरांनी गेल्या काही दिवसांत उच्छाद मांडला आहे. त्याची गंभीर दखल घेत जिल्हा पोलिस अधिक्षक संदीपसिंह गिल यांनी या घटनांच्या समांतर तपासासाठी जिल्हा गुन्हे शाखेचे पथकही कार्यरत केले. शिरूरचे उपविभागीय पोलिस अधिक्षक प्रशांत ढोले, रांजणगाव एमआयडीसी पोलिस ठाण्याचे पोलिस निरीक्षक महादेव वाघमोडे, स्थानिक गुन्हे शाखेचे पोलिस निरीक्षक अविनाश शिळीमकर, सहायक पोलिस निरीक्षक दत्ताजीराव मोहिते, पोलिस उपनिरीक्षक अविनाश थोरात, कुलदीप संकपाळ, पोलिस हवालदार तुषार पंदारे, जनार्दन शेळके, राजू मोमीन, संजीव जाधव, योगेश नागरगोजे, सागर धुमाळ, दत्तात्रेय शिंदे, उमेश कुतवळ, योगेश गुंड, संतोष साळुंखे या पथकाने तपासाचे मायक्रो प्लॅनिंग करताना दुचाकीचे वर्णन तपासले.
रांजणगावसह अशाच प्रकारचे गुन्हे शिरूर, शिक्रापूर, चाकण, आळंदी, कर्जत येथील पोलिस ठाण्यांच्या हद्दीतही घडल्याचे निष्पन्न झाल्यावर यातील चोरट्यांनी गुन्ह्यात वापरलेली स्पोर्ट्स बाईक कुठून येते, कुठे जाते यातून चोरट्यांचे येण्या- जाण्याचे मार्ग शोधून काढण्यासाठी तब्बल ३५० सीसीटीव्ही तपासले. या तपासणीचे फूटेज व तांत्रिक विश्लेषणाच्या आधारे गुप्त बातमीदाराकडून मिळालेल्या माहितीच्या आधारे यातील बहुतांश गुन्हे मारुती ऊर्फ गोविंद रामनाथ आंधळे याने त्याचा साथीदार शरद बापू पवार याच्यासह केल्याचे निष्पन्न झाल्यावर त्यांच्या मागावर पोलिस पथके रवाना केली, सापळे लावले. मात्र गेल्या काही दिवसांपासून ते पोलिसांना चकवा देत होते.
अखेर मारुती आंधळे हा काल अहिल्यानगर येथून शिरूरच्या दिशेने निघाल्याचे समजल्यानंतर सतरा कमानीच्या पुलाजवळ पोलिसांनी सापळा लावून त्याला पकडले. त्याने गुन्ह्यात वापरलेली स्पोर्टस बाईक जप्त करताना आठ गुन्ह्यांतील दहा तोळे वजनाचे सोन्याचे दागिने हस्तगत केले.