आंबळेतील दरोड्याच्या गुन्ह्यांतील दोघांना अटक

शिरूर, ता. १३ : आंबळे (ता. शिरूर) येथील दरोड्याच्या घटनेनंतर व त्या घटनेवेळी दोन ज्येष्ठ महिलांना झालेल्या मारहाणीची गंभीर दखल घेत पोलिसांनी तपासाची चक्रे वेगाने फिरविली. दरोड्याच्या गुन्ह्यांतील दोघांना अटक केली. यातील एक दरोडेखोरांच्या आंतरजिल्हा टोळीचा प्रमुख तर दुसरा या टोळीचा सदस्य आहे. स्थानिक गुन्हे शाखा व शिरूर पोलिस ठाण्याच्या गुन्हे शोध पथकाने ही कारवाई केली. गुन्ह्यात वापरलेली तवेरा मोटारही पोलिसांनी जप्त केली.
संजय तुकाराम गायकवाड (वय ४५, रा. धनगरवाडी, भोकरदन, जि. जालना) व सागर सुरेश शिंदे (वय १९, रा. संत तुकाराम नगर, मंठा, जि. जालना) अशी अटक केलेल्या दरोडेखोरांची नावे आहेत. दोघेही सराईत आहेत. गायकवाड हा दरोडेखोरांच्या टोळीचा प्रमुख असून, त्याच्या टोळीवर जालना, छत्रपती संभाजी नगर, नाशिक, बीड, जळगाव, परभणी व लातूर जिल्ह्यात दरोडा, जबरी चोरी, घरफोडी असे तब्बल १३ गंभीर गुन्हे दाखल असल्याची माहिती शिरूरचे पोलिस निरीक्षक संदेश केंजळे यांनी दिली.
दरम्यान, रविवारी (ता. ६) पहाटे आंबळे येथील आडबाजूला असलेल्या देशमुख वस्तीवर दरोडा पडला होता.
05360