मंत्रालयातील लिपिकास खंडाळे परिसरात लुटले

शिरूर, ता. १२ : पुणे-अहिल्यागर मार्गावर खंडाळे माथा परिसरात रस्त्याच्या कडेला एका हॉटेलजवळ मोटार थांबवून विश्रांती घेत असलेल्या आणि मंत्रालयात लिपिक असलेल्या युवकाला व त्याच्या मित्रांना तिघा चोरट्यांनी चाकूचा धाक दाखवून लुटले. रविवारी (ता.१२) पहाटे ही घटना घडली.
अक्षय हनुमंत बोरगे (रा. उलवे, ता. पनवेल, जि. रायगड) यांनी याबाबत रांजणगाव एमआयडीसी पोलिस ठाण्यात फिर्याद दिली असून, त्यांच्या फिर्यादीवरून तिघा चोरट्यांविरूद्ध रोडरॉबरीचा गुन्हा दाखल केला. पोलिसांनी दिलेल्या माहितीनुसार, मंत्रालयात लिपिक असलेले आणि मूळचे बीड जिल्ह्यातील बाभुळखुंटा येथे राहणारे बोरगे हे अशोक यादव व गणेश कारंडे यांच्यासह आपल्या मोटारीतून (क्र. एमएच १२ डब्ल्यूडब्ल्यू ४०५०) अहिल्यानगरहून पुण्याच्या दिशेने येत असताना झोप लागल्याने त्यांनी मोटार खंडाळे माथा परिसरातील एका हॉटेलजवळ रस्त्याकडेला उभी केली. मोटारीत ते मित्रांसह विश्रांती घेत असताना पहाटे साडेचारच्या सुमारास दुचाकीहून आलेल्या तिघा चोरट्यांनी मोटारीचा दरवाजा उघडून बोरगे यांच्यासह त्यांच्या मित्रांना चाकूचा धाक दाखविला. त्यांच्याजवळील एक तोळ्याची सोनसाखळी, सहा ग्रॅमची अंगठी, घड्याळ व चार हजार रोख असा एक लाख ऐंशी हजार रुपयांचा ऐवज हिसकावून पोबारा केला. या घटनेनंतर बोरगे यांनी पोलिसांकडे धाव घेऊन फिर्याद दिली.