वीजवाहिन्या टाकण्यास शेतकऱ्यांचा विरोध

शिरूर, ता. २३ : रांजणगाव एमआयडीसीच्या टप्पा क्रमांक तीनमधील कर्डे घाट परिसरातील औद्योगिक वसाहतीसाठी वीजवाहिन्या टाकण्याच्या कामास स्थानिक बाधित शेतकऱ्यांनी तीव्र विरोध दर्शविला. या कामातील अनेक खांब आमच्या खासगी जागेत व रस्त्यावर येत असल्याचा स्थानिक शेतकऱ्यांचा आक्षेप होता. दरम्यान, स्थानिकांना पांगविण्यासाठी पोलिस बळाचा वापर झाल्याने व काहींची धरपकड केल्याने तणाव पसरला.
एमआयडीसीसाठी विद्युत वाहिनी टाकताना अनियमीत पद्धतीने खांब उभारले आहेत. यातील अनेक खांब हे रस्त्याकडेच्या शेतकऱ्यांच्या शेतजमीनीत तर काही खांब रस्त्यात उभारले जात असल्याची स्थानिकांची तक्रार असून स्थानिक शेतकऱ्यांचा या कामाला विरोध आहे. खांब न उभारता भूमीगत वीजवाहिनी टाकावी अशी शेतकऱ्यांची मागणी आहे. दरम्यान, आज सकाळी न्हावरे फाटा, कर्डे घाट परिसरात हे काम सुरू होताच सरदवाडी, न्हावरे फाटा, घावटे मळा येथील शेतकऱ्यांनी विरोध केला. हिरकणी प्रतिष्ठान च्या अध्यक्षा तृप्ती सरोदे, सरदवाडीचे माजी उपसरपंच योगेश कर्डिले, ॲड. निनाद मगर, कृष्णा घावटे, दिपक सरोदे, सुभाष सरोदे, सुयश घावटे, सुजाता सरोदे, छाया सरोदे आदींनी तीव्र विरोध दर्शविला. त्यावेळी पोलिसांशीही शेतकऱ्यांची बाचाबाची झाल्याने आंदोलनस्थळी तणाव पसरला. दरम्यान, पोलिस निरीक्षक संदेश केंजळे यांनी अधिकची कुमक बोलावून शेतकऱ्यांना बाजूला घेण्याचा प्रयत्न केला. त्यावेळी शेतकरी आणखी आक्रमक झाले. ॲड. मगर यांनी खांब उभारणीचे काम करू न देण्याचा पवित्रा घेतल्याने केंजळे यांनी पोलिसांच्या मदतीने त्यांना ताब्यात घेतले व शिरूर पोलिस ठाण्यात आणले. दरम्यान, ॲड. मगर यांना नोटीस देऊन सोडून दिले.