अज्ञात ज्येष्ठाचा सरदवाडीत मृत्यू

शिरूर, ता. २७ : सदरवाडी (ता. शिरूर) पुणे- अहिल्यानगर महामार्गालगत येथे एका हॉटेलच्या समोर ज्येष्ठ व्यक्तीचा अचानक चक्कर येऊन पडल्याने मृत्यू झाला. ही घटना रविवारी (ता. २७) सकाळी नऊ वाजण्याच्या सुमारास घडली. मृत व्यक्तीची अद्याप ओळख पटू शकली नाही.
याबाबत प्रशांत बाळकृष्ण घावटे (रा. सरदवाडी) यांनी शिरूर पोलिस ठाण्यात खबर दिली. त्यानंतर पोलिसांनी घटनास्थळाचा पंचनामा करून आकस्मिक मृत्यूची नोंद केली. याबाबत पोलिसांनी माहिती दिली की, सदरवाडी येथे प्रशांत घावटे यांचे ‘चतुर्थी हॉटेल’ आहे. रविवारी सकाळी सहाच्या सुमारास त्यांच्या हॉटेलसमोर ज्येष्ठ व्यक्ती अचानक चक्कर येऊन कोसळली. त्यावेळी त्यांना रक्ताची उलटी झाली. घावटे यांनी त्यांना तत्काळ उपचारासाठी शिरूर येथील खासगी रुग्णालयात हलविले. मात्र, उपचारादरम्यान सकाळी सव्वाअकरा वाजता त्यांचा मृत्यू झाला. मृत व्यक्तीची ओळख पटलेली नाही. त्यांच्या नातेवाइकांचा शोध घेण्यात येत आहे. त्यांचे वय साधारण ७० ते ७५ असून, त्यांनी काळ्या रंगाचा चौकटी फूल बाह्यांचा शर्ट व हिरव्या रंगाची फूल पँट घातलेली आहे. अंगाने सडपातळ, केस काळे-पांढरे आणि बारीक दाढी-मिशी आहे.
या वर्णनाच्या व्यक्तीबाबत माहिती असल्यास शिरूर पोलिस ठाण्याशी (दूरध्वनी क्रमांक : ०२१३८ २२२१३९) किंवा ७७३८६०११९१ या मोबाईल क्रमांकावर संपर्क साधावा, असे आवाहन शिरूर पोलिस ठाण्याचे पोलिस निरीक्षक संदेश केंजळे यांनी केले आहे.