तीन अपघातांत तिघांचा मृत्यू

वाघोली : लोणीकंद आणि वाघोली परिसरात वाहनांनी धडक दिल्याने दोन वेगवेगळ्या अपघातांत एका तरुणीसह दोघांचा मृत्यू झाला. वाघोली-लोणीकंद दरम्यान मागील २७ तासांत अपघातांत तिघांचा मृत्यू झाला.

या घटनेनंतर तीनही चालक वाहनासह फरार झाले. लोणीकंदमधील जगताप डेअरीच्या पुढे इंडियन पेट्रोल पंपाजवळ मध्यरात्री दोनच्या सुमारास दोघे दुचाकीवरून निघाले होते, त्या वेळी ट्रकने दिलेल्या धडकेत दुचाकीवरील मीनाक्षी शिवशंकर जाधव (वय १९, रा. शिक्रापूर) हिचा मृत्यू झाला, तर दुसरा एक जण जखमी झाला. याप्रकरणी लोणीकंद पोलिस ठाण्यात ट्रकचालकावर गुन्हा दाखल झाला.

दुसऱ्या अपघातात वाघोलीतील कटकेवाडीत सकाळी साडेनऊच्या सुमारास दुचाकीला ट्रॅव्हल्स बसने धडक दिली. त्यात अर्जुन रोहिदास जाधव (वय २०, रा. पेरणेगाव) याचा मृत्यू झाला. याप्रकरणी वाघोली पोलिस ठाण्यात ट्रॅव्हल्स बसचालकावर गुन्हा दाखल झाला, तसेच वाघोलीत सौरभ शैलेश वाळूंज (वय २३, रा. साबळेवाडी, खेड) या दुचाकीस्वार तरुणाचा टेम्पोच्या धडकेत मृत्यू झाला.