कारेगावात विवाहितेची आत्महत्या

शिरूर, ता. ५ : कारेगाव (ता. शिरूर) येथे विवाहितेने गळफास घेऊन आत्महत्या केली. रविवारी (ता. ३) रात्री उशिरा ही घटना घडली. विवाहितेच्या आत्महत्येमागील नेमके कारण समजू शकले नसल्याने रांजणगाव एमआयडीसी पोलिसांनी आकस्मिक मृत्युची नोंद केली.
धनश्री नीलेश हांडे (वय २४) असे गळफास घेतल्याने मृत्यु झालेल्या विवाहितेचे नाव असून, त्यांचे बंधू संतोष किसन चितळकर (रा. ढवळपूरी, ता. पारनेर, जि. अहिल्यानगर) यांनी याबाबत पोलिसांना कळविले. पोलिसांनी दिलेल्या माहितीनूसार, मृत धनश्री यांचा सन २०१९मध्ये नीलेश हांडे यांच्याशी विवाह झाल्यानंतर त्या कारेगाव येथील म्हसोबा नगर मधे वास्तव्यास होत्या. रविवारी रात्री साडेसातच्या सुमारास नीलेश हांडे यांनी संतोष चितळकर यांना फोन करून, ‘धनश्री हिने दुपारपासून तीच्या खोलीचा दरवाजा आतून लावून घेतला असून, ती दरवाजा उघडत नाही व काहीच प्रतिसाद देत नाही,’ असे कळविल्यानंतर चितळकर यांनी रात्री सव्वादहाच्या सुमारास कारेगाव येथे येऊन पोलिसांना कळवून धनश्री यांच्या खोलीचा दरवाजा तोडला असता त्या गळफास घेतलेल्या अवस्थेत दिसून आल्या. स्थानिकांच्या मदतीने पोलिसांनी त्यांना खाली घेऊन शिरूर च्या ग्रामीण रूग्णालयात दाखल केले असता तेथील वैद्यकीय अधिकाऱ्यांनी तपासून मृत घोषित केले.
याबाबत रांजणगाव एमआयडीसी पोलिसांनी अकस्मात मृत्युची नोंद केली असून, पुढील तपास पोलिस हवालदार अभिमान कोळेकर करीत आहेत. मृत धनश्री हांडे यांच्या सासर व माहेरच्या मंडळींचे जाबजबाब नोंदविल्यानंतर गुन्हा दाखल केला जाईल, असे त्यांनी सांगितले.