शिरूरमध्ये राखीपौर्णिमेनिमित्त विविध अध्यात्मिक उपक्रम

शिरूर, ता. ९ : प्रत्येक घराला मंदिर बनविण्याची आणि तन, मन, धनाबरोबरच आपापसांतील परोपकारभाव व स्नेहसंबंधांचे तहहयात रक्षण करण्याची प्रतिज्ञा घेत शिरूरमधील भावा - बहिणींनी आध्यात्मिक रक्षाबंधन साजरे केले. ओम शांतीच्या पावन सूराबरोबरच दृष्टी, वृत्ती आणि आचरणाद्वारे पवित्र कृती करण्याचा आणि समानतेच्या सूत्रात परस्परांना बांधण्याचा संकल्पही यावेळी करण्यात आला.
प्रजापिता ब्रह्माकुमारी ईश्वरीय विश्वविद्यालयाच्या येथील सेवाकेंद्रात राखीपौर्णिमेनिमित्त विविध उपक्रमांचे आयोजन केले होते. यावेळी व्यासपीठ विविधरंगी राख्यांनी आणि फुलमाळांनी सजविले होते. या संस्थेचे संस्थापक ब्रह्माबाबांच्या प्रतिमेसमोर मोरपिसांनी सजविलेली मोठी राखी ठेवून तिचे शिरूर सेवाकेंद्राच्या प्रमुख बी. के. अर्चना बहेनजी यांच्याहस्ते पूजन केले. आध्यात्मिक गीतांनी यावेळी वातावरणात वेगळीच प्रसन्नता भरली.
बी. के. अर्चना बहेनजी यांनी रक्षाबंधनाचे आध्यात्मिक महत्त्व व रहस्य यावेळी विशद केले. यावेळी सर्वच उपस्थित महिला आणि पुरुषांना अर्चना बहेनजी, शकुंतला बहेनजी, सुप्रिया दीदी, वासंती दीदी, वैशाली बहेनजी, सुमन बहेनजी व पूजा दीदी यांनी, खास ब्रह्माकुमारीच्या आबू रोड येथील मुख्यालयातून आणलेल्या राख्या बांधल्या व ओवाळणी म्हणून स्वतःतील एका दूर्गुणाचा किंवा अनिष्ट प्रथेचा त्याग करण्याचे दान घेतले. सुरेश मुरलीधर जगताप यांच्या स्मृतीप्रित्यर्थ जगताप कुटुंबीयांनी उपस्थितांसाठी फराळाचे आयोजन केले होते. ब्रह्माकुमार गोरक्ष गवळी भाई यांनी उपस्थितांचे आभार मानले.