बिस्कीटांच्या ५५ लाखांच्या मालाचा अपहार

शिरूर, ता. १३ : रांजणगाव एमआयडीसीतील ब्रिटानिया कंपनीतून बिस्कीट वाहतुकीसाठी कंटेनर पुरविण्याच्या नावाखाली एका तरूणाने बिस्कीटांनी भरलेले सुमारे साडेसहा हजार बॉक्स कंपनीने सांगितलेल्या ठिकाणी खाली न करता इतरत्र नेऊन सुमारे ५५ लाख रूपयांच्या बिस्कीटच्या मालाचा अपहार केला.
‘एनसीपीएल कार्गो एलएलपी’ या ट्रान्सपोर्टचे व्यवस्थापक नजीर इक्बाल पठाण (रा. वाघोली, पुणे) यांनी दिलेल्या फिर्यादीवरून रांजणगाव एमआयडीसी पोलिसांनी मंगळवारी (ता. १२) उशिरा छत्रपती संभाजीनगर येथील ओंकार रोडे (पूर्ण नाव व पत्ता उपलब्ध नाही) याच्याविरूद्ध गुन्हा दाखल केला. तो फरारी झाला असून, त्याच्या व फसवणूक करून नेलेल्या मालाच्या शोधासाठी रांजणगाव एमआयडीसी पोलिस ठाण्यातील दोन पथके रवाना झाली आहेत.
पोलिसांनी दिलेल्या माहितीनूसार, रांजणगाव एमआयडीसीतील ब्रिटानिया कंपनीने त्यांच्या कंपनीतील बिस्कीटांचे बॉक्स वाहतूकीच्या कामाचे कंत्राट ‘एनसीपीएल कार्गो’ या ट्रान्सपोर्टला दिले आहे. मोठ्या प्रमाणातील माल वाहतूकीसाठी कंटेनर उपलब्ध नसल्याने कंपनीने ‘ब्लॅक बक’ नावाच्या संकेतस्थळावर भाडेकराराने कंटेनर हवे असल्याचे नमूद केले. त्यानंतर ओंकार रोडे याने या संकेतस्थळावरून ‘संस्कृती ट्रान्सपोर्ट’च्या नावे एनसीपीएल कार्गो या ट्रान्सपोर्टला इतरांचे पाच कंटेनर घेऊन ते भाड्याने दिले. २० जुलै ते सहा ऑगस्टदरम्यान या कंटेनरमधून सुमारे ५५ लाख दोन हजार १५६ रूपये किमतीचे बिस्कीटचे बॉक्स भरून ते भिवंडी येथे पाठविण्यात आले. रोडे याने चालकांशी संपर्क साधून, ‘मी कंपनीचाच प्रतिनिधी आहे. भिवंडीची चलने चुकून झाली आहेत,’ असे सांगत बिस्कीटांच्या बॉक्सने भरलेला एक कंटेनर कामशेत येथील गोदामात, तर उर्वरीत चार कंटेनरमधील बिस्कीटांचे बॉक्स छत्रपती संभाजीनगर येथील एका गोदामात खाली करून घेतले.
दरम्यान, अपेक्षित ठिकाणी बिस्कीटांचे बॉक्स न पोचल्याचे लक्षात येताच कंपनीमार्फत ट्रान्सपोर्टकडे तक्रार केली. याबाबत ट्रान्सपोर्टच्या प्रतिनिधीने रांजणगाव एमआयडीसी पोलिसांकडे धाव घेत फिर्याद दिली. कंपनी व ट्रान्सपोर्टच्या प्रतिनिधींकडून मिळालेल्या माहितीच्या आणि कंटेनर चालकांशी रोडे याच्या झालेल्या संपर्काच्या आधारे रांजणगाव एमआयडीसी पोलिसांनी त्याच्याविरूद्ध गुन्हा दाखल केला.

पाळेमुळे शोधून काढू : वाघमोडे
या गंभीर फसवणूकीच्या प्रकाराची दखल घेत शिरूरचे उपविभागीय पोलिस अधिकारी प्रशांत ढोले, रांजणगाव एमआयडीसी पोलिस ठाण्याचे पोलिस निरीक्षक महादेव वाघमोडे यांच्या मार्गदर्शनाखाली पोलिस उपनिरीक्षक अविनाश थोरात, पोलिस हवालदार दत्तात्रेय शिंदे, उमेश कुतवळ, योगेश गुंड, विलास आंबेकर या पथकाने तपासाची चक्रे वेगाने फिरविली. कंटेनर चालकांकडून माल खाली केलेल्या छत्रपती संभाजी नगर येथील गोदामावर तातडीने छापा मारून तेथे दोन कंटेनरमधून खाली केलेला सुमारे वीस लाख रूपयांचा माल (बिस्कीट पुड्यांचे बॉक्स) जप्त केला. इतर मुद्देमाल जप्त करतानाच संशयित आरोपीचा शोध घेतला जात असून, या गुन्ह्याची पाळेमुळे आम्ही लवकरच खोदून काढू, असा विश्वास पोलिस निरीक्षक महादेव वाघमोडे यांनी व्यक्त केला.