रांजणगावातील दोन अपघातात दोन ज्येष्ठ नागरिकांचा मृत्यू

शिरूर, ता. १६ : अज्ञात वाहनाने ठोकरल्याने दोन स्वतंत्र अपघातात दोन ज्येष्ठ नागरिकांना जीव गमवावा लागला. रांजणगाव गणपती (ता. शिरूर) परिसरात या घटना घडल्या. यातील एक अपघात गुरुवारी (ता. १४) दुपारी तीनच्या सुमारास, तर दुसरा गेल्या आठवड्यात झाला होता.
पुणे- अहिल्यानगर रस्त्यावर खंडाळे माथा येथील हॉटेल मातोश्री समोर गुरुवारी दुपारी साडेतीनच्या सुमारास घडलेल्या अपघातात मारुती लक्ष्मण ताम्हाणे (वय ६९, रा. थिटे वस्ती, खराडी, पुणे) यांचा मृत्यू झाला, तर त्यांच्या दुचाकीवरील सहप्रवासी पोपट पर्वती ताम्हाणे (वय ६२) हे गंभीर जखमी झाले. त्यांच्यावर खासगी रूग्णालयात उपचार चालू आहेत. मृत मारुती ताम्हाणे यांचे पुत्र राजेश ताम्हाणे यांनी दिलेल्या फिर्यादीवरून रांजणगाव एमआयडीसी पोलिसांनी अज्ञात वाहन चालकाविरुद्ध गुन्हा दाखल केला.
पोलिसांनी दिलेल्या माहितीनुसार, मारुती ताम्हाणे व पोपट ताम्हाणे हे दुचाकीवरून (क्र. एमएच १२ एलएस ८७६७) रांजणगाव येथे कामानिमित्त आले होते. काम उरकून पुन्हा खराडी येथे घरी निघाले असताना पोपट ताम्हाणे दुचाकी चालवीत होते. त्याचवेळी मागील बाजूने आलेल्या वाहनाचा त्यांच्या दुचाकीला कट लागला. यात दुचाकी घसरून दोघेही रस्त्यावर पडले. यात डोक्याला गंभीर मार लागल्याने मारुती यांचा मृत्यू झाला.
रांजणगाव- गणेगाव रस्त्यावर अज्ञात दुचाकीची धडक बसल्याने गंभीर जखमी झालेल्या राधा सुरेश बागल (वय ६५, रा. संकल्प सिटी, रांजणगाव गणपती) यांचा गुरुवारी रात्री उशिरा उपचारादरम्यान मृत्यू झाला. दोन ऑगस्टला रात्री सातच्या सुमारास हा अपघात झाला होता. सुनील सुरेश बागल यांनी दिलेल्या फिर्यादीवरून रांजणगाव एमआयडीसी पोलिसांनी अज्ञात दुचाकी चालकाविरुद्ध गुन्हा दाखल केला.
पोलिसांनी दिलेल्या माहितीनुसार, जेवण झाल्यानंतर राधा बागल या शतपावली करण्यासाठी रस्त्यावरून चालत जात असताना एका छोट्या वळणावर मागील बाजूने भरधाव आलेल्या दुचाकीची त्यांना धडक बसली. त्यात त्या गंभीर जखमी झाल्या. अपघातानंतर दुचाकी चालक न थांबता निघून गेला. गंभीर जखमी अवस्थेतील राधा यांच्यावर पुण्यातील खासगी रूग्णालयात उपचार चालू होते. तेथे उपचारादरम्यान त्यांचा मृत्यू झाला.