‘खास’ वाहनांवर कारवाईसाठी शिरूरमध्ये ठिय्या आंदोलन

शिरूर, ता. १५ : शिरूर तालुक्यासह जिल्ह्यात व राज्याच्या विविध भागात अनेक वाहनांवर बेकायदेशीरपणे आमदार, खासदार नावाचे स्टीकर आणि त्यात राजमुद्रेचा गैरवापर करण्याचे प्रकार वाढल्याच्या पार्श्वभूमीवर या विषयाकडे शासनाचे लक्ष वेधण्यासाठी सामाजिक कार्यकर्ते नीलेश वाळूंज यांनी स्वातंत्र्यदिनी दिवसभर येथील तहसीलदार कार्यालयाच्या प्रवेशद्वारात ठिय्या आंदोलन दिले.
वाळूंज यांच्या या आंदोलनाला सामाजिक कार्यकर्ते प्रीतेश फुलडाळे, मनसेचे तालुका संघटक अविनाश घोगरे, माजी शहर अध्यक्ष संदीप कडेकर, अखिल कुंभार समाज संघटनेचे अध्यक्ष योगेश जामदार, सामाजिक कार्यकर्ते सावळेराम आवारी, जय तुळजा भवानी देवीदासी निराधार महिला प्रतिष्ठानच्या अध्यक्षा सुनीता वाखारे, यशस्विनी वेल्फेअर फाउंडेशनच्या समन्वयक नम्रता गवारे, शुभम वाकचौरे आदींनी पाठिंबा दिला.
दरम्यान, तहसीलदार बाळासाहेब म्हस्के, सहायक पोलिस निरीक्षक दीपक करांडे यांनी वाळूंज यांच्याशी चर्चा केली. शिरूरचे उपविभागीय पोलिस अधिकारी प्रशांत ढोले यांनी दूरध्वनीवरून चर्चा करीत आमदार, खासदार अशी स्टिकर्स लावलेल्या दोन वाहनांवर दंडात्मक कारवाई केली असून, काही संबंध नसताना आमदार, खासदार नावाची स्टिकर्स लावलेल्या, राजमुद्रेचा बेकायदा वापर करणाऱ्या वाहनांवर कारवाई केली जाईल, काळ्या काचा, विनाक्रमांकासह फॅन्सी नंबरप्लेट असलेल्या वाहनांविरुद्ध कारवाईची मोहीम सुरू केली जाईल, असे लेखी आश्वासन दिले.