कोयत्याचा धाक दाखवून महिलांचे दागिने लुटले

शिरूर, ता. १६ : चालक लंघुशंकेसाठी रस्त्याच्या कडेला मोटार उभी करून थांबला असताना दुचाकीवरून आलेल्या दोघांनी त्याच्या गळ्याला चाकू लावून मोटारीतील इतरांना धमकावले व कोयत्याचा धाक दाखवून मोटारीतील महिलांच्या अंगावरील दागिने ओरबाडून घेत पलायन केले. पुणे- अहिल्यानगर रस्त्यावर रांजणगाव गणपतीजवळ शनिवारी (ता. १६) पहाटे हा प्रकार घडला.
याबाबत राम बाबासाहेब तायनाक (रा. कानड, ता. सेलू, जि. परभणी) यांनी दिलेल्या फिर्यादीवरून रांजणगाव एमआयडीसी पोलिसांनी दुचाकीवरून आलेल्या दोन चोरट्यांविरुद्ध लूटमारीचा गुन्हा दाखल केला. पोलिसांनी दिलेल्या माहितीनुसार, तायनाक यांच्या मावशीचा मुलगा आजारी असल्याने कुटुंबीयांसह त्यांना भेटण्यासाठी पुणे येथे चालले होते. यासाठी त्यांनी गणेश मदन खडसे यांची इर्टिगा मोटार (क्र. एमएच १४ एचएन ९९०९) भाडेतत्वावर घेतली होती. रांजणगावच्या पुढे आल्यावर चालक खडसे यांनी लघुशंकेसाठी मोटार रस्त्याच्या कडेला थांबवली असता मागील बाजूने दोन चोरटे आले. त्यांनी खडसे याच्या गळ्याला धारदार चाकू लावीत मोटारीतील इतरांना धमकावले. त्याचवेळी एका चोरट्याने कोयत्याचा धाक दाखवीत मोटारीतील महिलांच्या अंगावरील मंगळसूत्र व कर्णफुले असे ८५ हजार रुपये किमतीचे सोन्याचे दागिने ओरबाडून घेतले. ‘इथे थांबू नका नाहीतर जीवे मारून टाकू,’ अशी धमकी देत ते दुचाकीवरून निघून गेले.
या प्रकाराने घाबरलेल्या तायनाक यांनी रांजणगाव एमआयडीसी पोलिसांकडे धाव घेत फिर्याद दिली. या घटनेची दखल घेत पोलिस निरीक्षक महादेव वाघमोडे, उपनिरीक्षक अविनाश थोरात व पोलिस पथकाने तातडीने घटनास्थळी धाव घेत परिसराची नाकेबंदी केली. मात्र चोरट्यांचा ठावठिकाणा लागू शकला नाही. भररस्त्यावर झालेल्या या लूटमारीच्या प्रकाराने खळबळ उडाली. उपनिरीक्षक थोरात पुढील तपास करीत आहेत.