शिरूर बसस्थानकामधून महिलेचे मंगळसूत्र लांबविले

शिरूर, ता. १२ : शिरूर बसस्थानकावर चोरट्यांचा, खिसेकापूंचा सुळसुळाट झाला असून, आज दुपारी एका ज्येष्ठ महिलेच्या पिशवीतील दीड तोळे वजनाचे मंगळसूत्र चोरट्यांनी लांबविल्याने खळबळ उडाली.
याबाबत लता सुदाम जामदार (वय ६५, रा. कुंभार आळी, शिरूर) यांनी दिलेल्या फिर्यादीवरून शिरूर पोलिसांनी चोरीचा गुन्हा दाखल केला. पोलिसांनी दिलेल्या माहितीनुसार, लता जामदार या कौटुंबिक कामासाठी अहिल्यानगर येथे गेल्या होत्या. तेथून आज दुपारी त्या एसटीने शिरूरला आल्या. शिरूर बसस्थानकावर एसटीतून उतरल्यानंतर त्यांना त्यांच्याजवळील पिशवीची चैन उघडी असल्याचे दिसल्याने त्यांनी पिशवीतील साहित्याची तपासणी केली असता पिशवीच्या कप्प्यात ठेवलेले सुमारे दीड तोळे वजनाचे गंठण चोरीला गेल्याचे त्यांच्या लक्षात आले. याबाबत त्यांनी बसस्थानकावरील कर्मचाऱ्यांना कळवून बस थांबवून ठेवली. दरम्यान, पोलिस हवालदार नाथसाहेब जगताप, किरण खराडे आदींनी बसस्थानकावर धाव घेत परिसरात चौकशी केली. सीसीटीव्ही फूटेजही तपासले. मात्र, चोरट्यांचा ठावठिकाणा लागू शकला नाही.