पार्किंगमधील वाहनांचे टायर चोरणाऱ्या चौघांना अटक

शिरूर, ता. १९ : घराबाहेर, मोठ्या सोसायट्यांच्या पार्किंगमध्ये किंवा भाजी मार्केटमध्ये उभ्या केलेल्या पिकअप जीप हेरून टायरसह त्यांची चाके चोरून नेणाऱ्या चौघांना जेरबंद करण्यात रांजणगाव एमआयडीसी पोलिसांना यश आले. गुन्ह्यासाठी वापरलेल्या मोटारीसह सुमारे १० लाख रुपये किंमतीचे टायर त्यांच्याकडून जप्त करण्यात आले आहेत.
अक्षय रुस्तुम राठोड (वय २८, रा. आव्हाळवाडी, ता. हवेली, जि. पुणे), तुषार लक्ष्मणराव दामेकर (वय २३, रा. देगलूर, ता. देगलूर, जि. नांदेड), करण सुभाष राठोड (वय २३, रा. औंढा नागनाथ, ता. औंढा, जि. हिंगोली) व सुनील गंगाधर भोसले (वय २५, रा. वाघी, ता. जि. नांदेड) अशी अटक केलेल्या संशयित आरोपींची नावे असून, त्यांनी चोरी करण्यासाठी वापरलेल्या इर्टीगा मोटारीसह १४ पिकअप मोटारींची डिक्ससह टायर असलेली चाके त्यांच्याकडून जप्त करण्यात आली. रांजणगाव एमआयडीसी पोलिस ठाण्याचे पोलिस निरीक्षक महादेव वाघमोडे यांच्या नेतृत्वाखालील पोलिस उपनिरीक्षक अविनाश थोरात, सहायक फौजदार दत्तात्रेय शिंदे, उमेश कुतवळ, योगेश गुंड, किशोर शिवणकर या पथकाने ही धाडसी कारवाई केली. ताब्यात घेतलेल्या चोरट्यांनी गुन्ह्याची कबुली दिली असल्याचे पोलिसांनी सांगितले.
कारेगाव (ता. शिरूर) येथील मशरराम गमनाराम देवासी यांच्या घरासमोर लावलेल्या त्यांच्या पिकअप जीपची चाके काही दिवसांपूर्वी चोरीला गेली होती. कारेगाव, रांजणगाव व एमआयडीसी परिसरात असेच आणखी प्रकार घडल्यानंतर रांजणगाव एमआयडीसी पोलिस ठाण्याच्या पथकाने साध्या वेशात पाळत ठेवली. चोरांवर लक्ष केंद्रित करताना परीसरातील सुमारे पन्नासहून अधिक सीसीटीव्ही फुटेज तपासले. तांत्रिक विश्लेषण व गोपनीय सूत्रांकडून मिळालेल्या माहितीच्या आधारे चोरट्यांचा ठावठिकाणा समजताच पोलिस पथकाने वाघोली येथे सापळा लावून त्यांना ताब्यात घेतले. संशयित आरोपींनी शिरूर, शिक्रापूर व रांजणगाव एमआयडीसी परिसरात टायर चोरीचे चार गुन्हे केल्याचे तपासातून उघड झाले असून, त्यांनी इतरत्रही असे गुन्हे केल्याचा संशय आहे. त्यादृष्टीने तपास केला जात असल्याचे पोलिस निरीक्षक वाघमोडे यांनी सांगितले.