शेतकऱ्यांची त्वरित सुटका करा

सासवड, ता. ७ : ‘‘पुरंदर विमानतळ प्रकल्पाच्या विरोधात आंदोलन करणाऱ्या शेतकऱ्यांनी शांतता आणि सामंजस्याची भूमिका घेतली आहे, परंतु राज्य सरकारनेही त्यांच्या भावनांचा आदर करत संवेदनशिलतेने वागावे,’’ असे आवाहन खासदार सुप्रिया सुळे यांनी केले. शेतकऱ्यांना विश्वासात घेतल्याशिवाय कोणतीही कारवाई करू नये आणि अटक केलेल्या शेतकऱ्यांची त्वरित सुटका करावी, अशी मागणीही त्यांनी केली.
पुरंदर विमानतळाच्या विरोधातील शेतकऱ्यांच्या आंदोलनाला हिंसक वळण लागल्यानंतर तणाव वाढला होता. या पार्श्वभूमीवर खासदार सुळे यांनी मंगळवारी (ता. ६) सासवड येथील उपविभागीय पोलिस अधिकारी कार्यालयात पुणे जिल्हा ग्रामीणचे पोलिस अधीक्षक पंकज देशमुख यांच्यासोबत बैठक घेतली. या बैठकीला बाधित गावातील शेतकऱ्यांचे प्रतिनिधी उपस्थित होते. यानंतर झालेल्या पत्रकार परिषदेत त्या बोलत होत्या.
यावेळी खासदार सुळे म्हणाल्या, ‘‘या आंदोलनात कोणताही राजकीय पक्ष सहभागी होणार नाही. बाधित गावातील निवडक प्रतिनिधींची एक कृती समिती स्थापन केली जाईल. त्यांनी दोन आठवड्यांत आपल्या अटी, शर्ती आदी नमूद कराव्यात. त्यानंतर स्थानिक आजी- माजी लोकप्रतिनिधींसह कृती समितीसोबत मुख्यमंत्री आणि दोन्ही उपमुख्यमंत्र्यांची भेट घेऊन चर्चा केली जाईल. त्यानंतर कृती समिती निर्णय घेईल, तोपर्यंत ड्रोन आणि इतर सर्वेक्षण थांबवावे.’’ याबाबत मी स्वतः आमदार विजय शिवतारे, माजी आमदार संजय जगताप, अशोक टेकवडे, दिगंबर दुर्गाडे, जालिंदर कामठे आणि संभाजी झेंडे यांच्याशी चर्चा केली आहे. आमचा विकासकामांना विरोध नाही, परंतु शेतकऱ्यांचे समाधान होईपर्यंत शासनाने जमीन संपादन करू नये.’’
या बैठकीपूर्वी सोमवारी (ता. ५) रात्री खासदार सुळे यांनी कुंभारवळण येथे जाऊन दिवंगत अंजनाबाई कामठे यांच्या कुटुंबीयांचे सांत्वन केले आणि इतर बाधित शेतकऱ्यांशी संवाद साधून त्यांच्या भावना जाणून घेतल्या. परिस्थितीचे गांभीर्य लक्षात घेऊन त्यांनी तातडीने पोलिस अधीक्षक पंकज देशमुख यांच्याशी संपर्क साधून मंगळवारी तातडीने बैठकीचे आयोजन केले.

आम्ही खासदार आणि ग्रामस्थांना कायदेशीर बाजू आणि वस्तुस्थिती सांगितली आहे. ग्रामस्थांनी पोलिस प्रशासनाशी योग्य संवाद ठेवावा आणि अफवांवर विश्वास ठेवू नये. अटक केलेल्या शेतकऱ्यांच्या जामिनाबाबत वस्तुस्थिती पाहून कायदेशीर प्रक्रिया केली जाईल.
- पंकज देशमुख, अधीक्षक, पुणे ग्रामीण पोलिस