सासवडमध्ये डेंग्यू दिनानिमित्त जनजागृती रॅली

सासवड, ता. १६ : राष्ट्रीय डेंग्यू दिनाचे औचित्य साधून सासवड नगरपरिषद आणि आरोग्य विभाग, पंचायत समिती पुरंदर यांच्या संयुक्त विद्यमाने शहरात डेंग्यू आजार जनजागरण अभियानाला सुरुवात झाली.
सासवडचे मुख्याधिकारी डॉ. कैलास चव्हाण आणि तालुका आरोग्य अधिकारी डॉ. विक्रम काळे यांच्या मार्गदर्शनाखाली हे अभियान राबविण्यात येत आहे. या जनजागरण अभियानाचा भाग म्हणून सासवड (ता. पुरंदर) येथील मीरा नर्सिंग स्कूलमधील विद्यार्थिनींच्या सक्रिय सहभागातून शहरात डेंग्यू आजाराबद्दल जनजागृती करणारी रॅली काढण्यात आली. या रॅलीच्या माध्यमातून विद्यार्थिनींनी नागरिकांमध्ये डेंग्यूच्या प्रतिबंधात्मक उपायांविषयी संदेश पोहोचवला. यासोबतच, डेंग्यू आजार कार्यशाळेचे आयोजन केले होते. या कार्यशाळेचे उद्‍घाटन आरोग्य विभाग प्रमुख सासवड नगरपरिषद मोहन चव्हाण यांच्या हस्ते झाले. याप्रसंगी तालुका विस्तार अधिकारी प्रकाश चवरे यांसह आरोग्य निरीक्षक, आरोग्य सेवक आणि मीरा नर्सिंग स्कूल येथील शिक्षकवृंद उपस्थित होते.
यावेळी मोहन चव्हाण यांनी उपस्थितांना डेंग्यू आजाराची सर्वसाधारण माहिती, त्याची लक्षणे आणि उपचारांविषयी सविस्तर मार्गदर्शन केले. नागरिकांनी आपल्या घराच्या आसपासचा परिसर स्वच्छ ठेवावा. निरुपयोगी टायर, नारळाच्या करवंट्या, मोकळे डबे, बादल्या यांसारख्या निरुपयोगी वस्तूंची योग्य विल्हेवाट लावावी. डासांपासून बचाव करण्यासाठी मच्छरदाणीचा नियमित वापर करावा. आपल्या घराजवळ डासोत्पत्तीची ठिकाणे शोधून ती नष्ट करावीत आणि गटारे नियमितपणे स्वच्छ करावीत. पाणी साठणाऱ्या ठिकाणी रॉकेल किंवा जळलेले तेल टाकावे. तसेच, घरातील मोठ्या पाण्याच्या टाक्यांमध्ये गप्पी मासे सोडावेत, जेणेकरून डासांची वाढ रोखता येईल, असे आवाहन चव्हाण यांनी केले.