अत्रे प्रतिष्ठानचे साहित्य, पत्रकारिता, कलाकार पुरस्कार जाहीर

सासवड, ता. २५ : आचार्य अत्रे विकास प्रतिष्ठान, पुरंदर आणि महाराष्ट्र साहित्य परिषद, सासवड शाखा यांच्यावतीने (ता. १३) जून आचार्य प्र. के. अत्रे यांचा ५६ वा स्मृतिदिन ‘आचार्य अत्रे पुरस्कार’ सोहळ्याने साजरा होणार आहे. आचार्य अत्रे यांच्या स्मृती रसिकांसमोर राहाव्यात या उद्देशाने दरवर्षीप्रमाणे याही वर्षी ‘साहित्य’, ‘पत्रकारिता’ आणि ‘कलाकार’ या क्षेत्रांतील मान्यवरांना हे पुरस्कार प्रदान केले जाणार आहेत. या पुरस्काराचे हे ३५ वे वर्ष आहे.
यावर्षीचा आचार्य अत्रे ‘साहित्य पुरस्कार’ मराठी साहित्यातील ज्येष्ठ लेखक डॉ. सुरेश कोडीतकर यांना जाहीर झाला आहे. आचार्य अत्रे ‘पत्रकारिता पुरस्कार’ पत्रकार मंदार गोंजारी यांना प्रदान करण्यात येणार आहे. तर आचार्य अत्रे ‘कलाकार पुरस्कार’ ज्येष्ठ मराठी नाट्य दिग्दर्शक सतीश आळेकर यांना जाहीर केला आहे.
हा पुरस्कार वितरण सोहळा १३ जून या दिवशी सायंकाळी ५ वाजता सासवड येथील डॉ. बाबासाहेब आंबेडकर सांस्कृतिक भवन येथे होईल. पुणे महापालिकेचे माजी उपमहापौर डॉ. सतीश देसाई हे कार्यक्रमास प्रमुख पाहुणे म्हणून उपस्थित राहणार आहेत, अशी माहिती प्रतिष्ठानचे अध्यक्ष विजय कोलते यांनी दिली.
या सोहळ्यासाठी मोठ्या संख्येने उपस्थित राहण्याचे आवाहन महाराष्ट्र साहित्य परिषद, सासवड शाखेचे अध्यक्ष दिलीप निरगुडे यांनी केले आहे. याप्रसंगी प्रतिष्ठानचे सचिव शांताराम पोमण, बंडूकाका जगताप, अण्णासाहेब खाडे, वसंतराव ताकवले, रमेश कोतवाल, बाळासाहेब मुळीक, रवींद्र पोमण, रामचंद्र खेडेकर, अशपाक बागवान, कलाताई फडतरे, धनाजी नागणे आदी उपस्थित होते.