पिस्तूल रोखल्याप्रकरणी पाच जणांना पोलिस कोठडी

सासवड, ता. २ : पुतण्या व पुतणीवर पिस्तूल रोखल्याप्रकरणी शिवसेनेचे (शिंदे) जिल्हाप्रमुख दिलीप सोपान यादव आणि त्यांचा मुलगा विनय यादव यांच्यासह बारा जणांवर गुन्हा दाखल आहे. त्यापैकी अटक असलेल्या विनय याच्यासह पाच आरोपींना सासवड न्यायालयाने सोमवारी (ता. २) तीन दिवसांची पोलीस कोठडी सुनावली.
सासवड शहरातील महाराजा लॉन्स येथे २४ मे रोजी फिर्यादी केतकी धनंजय झेंडे यांच्या चुलत भावाचा साखरपुडा होता. या कार्यक्रमावेळी पिस्तूल रोखल्याचा प्रकार झाला होता. विनय यादव, दिलीप यादव, सुनीता यादव, शुभांगी दौंडकर, अक्षता यादव, भुजंग यादव, महेश यादव आणि इतरही उपस्थित होते. या प्रकरणी केतकी झेंडे यांनी फिर्याद दिली होती. या प्रकरणात विनय यादव, एकनाथ दत्तात्रेय खेंगरे, महेश काशिनाथ यादव, संकेत भुजंग यादव, रितेश भुजंग यादव यांना पोलिस कोठडी मिळाली आहे. एकूण १२ आरोपींपैकी अद्याप ७ आरोपी फरारी आहे. त्यात दिलीप यादव यांचा समावेश आहे. सरकारी पक्षाच्या वतीने अॅड. अमोल गर्जे यांनी काम पाहिले.
या प्रकरणातील इतर ७ आरोपींवर गुन्ह्याच्या अनुषंगाने तपास सुरू आहे. तपासात दोषी आढळल्यास त्यांना अटक करून न्यायालयात हजर केले जाईल, असे सासवडचे पोलिस निरीक्षक ऋषिकेश अधिकारी यांनी सांगितले.