‘एसटी वाचवा’ मोहिमेला सासवडकरांचा प्रतिसाद

सासवड, ता. ८ : महाराष्ट्राची ‘जीवनवाहिनी’ आणि दररोज ५५ लाख प्रवाशांची वाहतूक करणारी एसटी (राज्य परिवहन मंडळ) नुकतीच ७७ वर्षांची झाली असली, तरी सध्या गंभीर समस्यांशी झगडत आहे. ‘मासूम’ संस्थेने पुढाकार घेत ‘एसटी वाचवा, एसटी वाढवा’ ही मोहीम सुरू केली आहे. संस्थेच्या जयश्री नलगे आणि योगेश धेंडे यांनी मुख्यमंत्री आणि परिवहन मंत्र्यांना पत्रे, ई मेल आणि ऑनलाइन याचिकेच्या माध्यमातून एसटी वाचवण्यासाठी आणि तिची सेवा सुधारण्यासाठी नागरिकांना मोहिमेत सहभागी होण्याचे आवाहन केले आहे.
सासवड (ता. पुरंदर) येथील आगारात याबाबत पत्रक वाटून या मोहिमेत सहभागी होण्याचे आवाहन केले. त्यास प्रवासी व नागरिकांकडून चांगला प्रतिसाद मिळत असल्याचे जया नलगे यांनी सांगितले. याप्रसंगी सासवड आगाराचे प्रमुख सागर गाडे यांसह कर्मचारी, प्रवासी उपस्थित होते. नागरिकांनी जास्तीत जास्त एसटीने प्रवास करून सरकारवर सेवा सुधारण्यासाठी दबाव आणावा, असे आवाहनही या पत्रकातून केले आहे.