सासवडमध्ये पथविक्रेत्यांकडून दुप्पट ‘जागा भाडे’ वसुली

सासवड, ता. ५ : सासवड शहरातील जिजामाता फळे-भाजीपाला बाजारामधील पथविक्रेत्यांकडून अचानकपणे दुप्पट ‘जागा भाडे’ (दैनिक कर) वसूल केल्याने पथविक्रेत्यांत खळबळ उडाली आहे. कोणतीही पूर्वसूचना, जाहीर नोटीस किंवा वर्तमानपत्रात जाहिरात न देता ‘अंकुर ॲडव्हर्टायझिंग’ या कंपनीने दोन दिवस ५० रुपयांऐवजी १०० रुपये प्रतिदिन कर वसुली केल्याचे विक्रेत्यांनी सांगितले.
या मनमानी वसुलीविरोधात जिजामाता फळे-भाजीपाला बाजारातील पथविक्रेत्यांनी गुरुवारी (ता. ५) सासवड नगरपालिकेत मुख्याधिकारी डॉ. कैलास चव्हाण यांची भेट घेऊन निवेदन दिले. विक्रेत्यांच्या तक्रारी ऐकून घेतल्यानंतर, मुख्याधिकारी डॉ. चव्हाण यांनी, अशी कोणतीही करवाढ वसुलीसाठी तोंडी किंवा लेखी निर्देश दिलेले नसल्याचे स्पष्ट करीत संबंधित अभिकर्त्यांना म्हणजेच ‘अंकुर ॲडव्हर्टायझिंग’ कंपनीला लेखी समज देण्याचे आश्‍वासन दिले आहे.
यावेळी जिजामाता फळ व भाजीपाला विक्रेते संघटनेचे अध्यक्ष माजी नगरसेवक हरून बागवान, उपाध्यक्ष सुनीता होले, सचिव गणेश बुद्धिवंत यांच्यासह राजेंद्र होले, रेखा बुद्धिवंत, विमल लवांडे, विकास बुद्धिवंत, सुवर्णा होले, मनोज होले, मालन पवार, साहिल बागवान, उबेद बागवान, सविता जाधव, पुष्पा मनोज होले, कल्पना जालिंदर काळे, उमेश राऊत, कलाबाई पवार, गुंडाराव कल्लशेट्टी, लीलाबाई धोत्रे आदी पथविक्रेते उपस्थित होते.
गुरुवारी (ता. ५) आम्ही पथविक्रेते मुख्याधिकाऱ्यांना भेटल्यावर त्यांनी जास्तीचे पन्नास रुपये न देण्याबाबत सांगितले. तरीही पुन्हा ठेकेदाराच्या माणसाकडून पथविक्रेत्यांकडे शंभर रुपयांची मागणी केली. मात्र त्याला पथविक्रेत्यांनी, आम्ही मुख्याधिकाऱ्यांना भेटलो असून त्यांनी सांगितल्याप्रमाणेच जागा भाडे देणार असे सांगितल्याचे हरून बागवान म्हणाले.