वारी काळात वाहतूक मार्गात बदल

सासवड, ता. १५ : संत ज्ञानेश्‍वर महाराज आणि संत तुकाराम महाराज आषाढवारी पालखी सोहळ्याच्या पार्श्‍वभूमीवर पुणे ग्रामीण जिल्ह्याच्या हद्दीत वाहतुकीमध्ये महत्त्वपूर्ण बदल जाहीर करण्यात आले आहेत. बुधवार (ता. १८ जून) पासून ते मंगळवार (ता. १ जुलै) पर्यंत हे बदल लागू राहतील, असे जिल्हाधिकारी तथा जिल्हादंडाधिकारी जितेंद्र डूडी यांनी सांगितले. पालखी सोहळ्यादरम्यान भाविकांची सुरक्षितता आणि सुव्यवस्थेसाठी हे बदल अत्यावश्यक असल्याचे प्रशासनाने स्पष्ट केले आहे.
वाहतूक बदलांमुळे प्रवाशांची गैरसोय होऊ नये यासाठी नियोजन करण्यात आले आहे. सर्व वाहनचालकांनी पर्यायी मार्गांचा वापर करून प्रशासनास सहकार्य करावे, असे आवाहन जिल्हाधिकारी कार्यालयाने केले आहे.

असा राहील बदल
- २२ जूनला रात्री २ वाजल्यापासून २४ जूनच्या रात्री १२ वाजेपर्यंत, पुण्याकडून दिवेघाट आणि बोपदेव घाट मार्गे सासवडकडे जाणारी वाहतूक पूर्णपणे बंद राहील.
- या कालावधीत, वाहनचालकांनी खडी मशिन चौक (कात्रज)-कापूरहोळ या पर्यायी मार्गाचा वापर करावा.
- सासवडकडून पुण्याकडे येणारी वाहतूक गराडे-खेड शिवापूर मार्गे पुण्याकडे वळविण्यात येईल.
- मंगळवारी (ता. २४) रात्री २ वाजल्यापासून ते बुधवारी (ता. २५) रात्री १२ वाजेपर्यंत, पुणे येथून सासवड-जेजुरी-वाल्हे-नीरेकडे तसेच नीरा येथून पुण्याकडे जाणाऱ्या वाहनांनी झेंडेवाडी-पारगाव मेमाणे-सुपे-मोरगाव-नीरा या मार्गाचा वापर करावा.
- गुरुवारी (ता. २६) रात्री २ वाजल्यापासून सायंकाळी ५ वाजेपर्यंत पुणे येथून सासवड-जेजुरी-वाल्हे -नीरेकडे तसेच नीरा येथून पुण्याकडे जाणाऱ्या वाहनांनी सासवड-जेजुरी-मोरगाव या पर्यायी मार्गाचा वापर करावा.
- गुरुवार (ता. २६) ते शनिवार (ता. २८) या काळात फलटण/लोणंद येथून पुणे येथे येणारी तसेच पुणे येथून फलटण/लोणंदकडे जाणारी वाहतूक शिरवळ मार्गे वळविण्यात येईल.